����ý

Cyfradd ganrannol flynyddol (APR)

Mae’r gyfradd ganrannol flynyddol nid yn unig yn rhoi’r gyfradd llog ond mae hefyd yn ystyried unrhyw gostau sydd ynghlwm â’r benthyciad.

Mae APR yn ffigur sy’n cael ei roi ar gyfer pob morgais, benthyciad a cherdyn credyd ac mae’r banc yn defnyddio dull penodol i gyfrifo’r ffigur, fel y nodir gan yr Awdurdod Gwasanaethau Ariannol. Mae’r APR cynrychiadol yn ffigur sy’n hawdd i’w gymharu rhwng gwahanol gyfrifon. Mae’r cyfrifiad ar gyfer APR yn ystyried yr holl ffïoedd a chostau sy’n rhaid i ti eu talu ar ben y gyfradd llog sylfaenol.

APR Cynrychiadol

Pan fydd cyfrifon yn cael eu hysbysebu, yr APR maen nhw’n ei ddefnyddio yw’r APR cynrychiadol. Nid yw’n golygu y bydd pawb yn siŵr o gael y gyfradd hon. Bydd yn rhaid iddyn nhw wneud gwiriadau credyd ar bob unigolyn ac yna penderfynu pwy sy’n gymwys i gael y gyfradd llog hon. Mae rheolau presennol yr UE yn nodi bod yn rhaid i o leiaf 51% o’r bobl sy’n gwneud cais amdano gael y gyfradd sy’n cael ei hysbysebu. Mae hyn yn golygu y gallai 49% o’r bobl gael cyfradd llog sy’n uwch na’r un sy’n cael ei hysbysebu.

APR Personol

Yr APR personol yw’r union gyfradd rwyt ti’n ei thalu unwaith y byddi wedi gwneud cais am y benthyciad a bod y cwmni credyd wedi asesu pa mor addas wyt ti ar ei chyfer. Gallai hwn fod yn wahanol iawn i’r APR cynrychiadol ac mae’n bwysig dy fod yn gwirio’r gyfradd maen nhw’n ei chynnig i ti.

Gyda morgais, mae’r APR cynrychiadol a’r APR personol yr un fath.

Cyfradd flynyddol gyfatebol (AER)

Mae’r gyfradd flynyddol gyfatebol (AER) yn cael ei defnyddio yn y DU fel cyfradd gyffredinol i gymharu cyfrifon cynilo’n unig. Mae’n debyg i adlog oherwydd, y tro cyntaf mae’r llog yn cael ei gyfrifo, mae gwerth y llog yn cael ei gyfuno â’r swm gwreiddiol. Pan fydd y llog yn cael ei gyfrifo eto, mae’r swm newydd yn cael ei ddefnyddio.

Byddi’n ennill llog ar dy log sy’n golygu dy fod yn gwneud mwy o arian. Mae’r llog yn gallu cael ei adlogi nifer o weithiau mewn blwyddyn, gan ddibynnu ar ba mor aml mae’r banc yn cyfrifo’r llogau yn ystod y flwyddyn.

Dyma’r fformiwla i gyfrifo AER:

i yw’r gyfradd llog fel degolyn

n yw’r nifer o weithiau mae’r llog yn cael ei dalu drwy gydol un flwyddyn.

Mae’r fformiwla hon yn cael ei rhoi yn dy restr fformiwlâu yn yr arholiad.