����ý

Mae rhyngwyneb defnyddiwr graffigol weithiau’n cael ei alw’n GUI (graphical user interface). Fel arfer mae’r defnyddiwr yn dewis opsiwn drwy bwyntio llygoden at eicon sy’n cynrychioli’r opsiwn hwnnw.

Mae nodweddion GUI yn cynnwys y canlynol:

• Maen nhw’n llawer haws i’w defnyddio, o safbwynt dechreuwyr.
• Maen nhw’n dy alluogi di i gyfnewid gwybodaeth yn hawdd rhwng meddalwedd gan ddefnyddio torri a gludo neu 'llusgo a gollwng'.
• Maen nhw’n defnyddio llawer o gof a phŵer prosesu. Maen nhw’n gallu bod yn arafach i’w defnyddio na rhyngwyneb llinell orchymyn os wyt ti’n ddefnyddiwr arbenigol.
• Maen nhw’n gallu bod yn ddiflas i ddefnyddwyr profiadol pan mae angen mynd drwy nifer o gamau er mwyn cyflawni tasgau syml.

Wrth drafod rhyngwynebau defnyddwyr, mae’n bwysig nodi bod gan Windows XP, Windows Vista, Apple OSX ac Ubuntu i gyd ryngwynebau defnyddwyr graffigol.

Rhyngwynebau defnyddwyr da

Dylai rhyngwyneb defnyddiwr da:

• fod yn ddeniadol ac yn ddymunol i’r llygad
• caniatáu i’r defnyddiwr roi cynnig ar wahanol opsiynau yn hawdd
• bod yn hawdd i’w ddefnyddio
• defnyddio lliwiau addas ar gyfer meysydd allweddol
• defnyddio geiriau sy’n hawdd eu deall ac sydd wedi’u hanelu at y math o ddefnyddiwr
• cynnwys dogfennau cymorth

Dylai hefyd ystyried anghenion defnyddwyr. Er enghraifft, mae’n debyg y bydd yn well gan blant ifanc weld lluniau yn hytrach na geiriau, ac efallai y byddai pobl sydd ag anableddau’n elwa o ddyfeisiau mewnbynnu neu allbynnu penodol.