����ý

Beth sy'n gwneud cynhyrchiad realistig? Mae'n anodd dod o hyd i rysáit ond ceir nifer o elfennau pwysig y gallet ti ddisgwyl eu gweld:

• Y bedwaredd wal. Bydd set cynhyrchiad realistig yn dri dimensiwn, a bydd yn cael ei berfformio mewn theatr prosceniwm gan amlaf, sy'n cryfhau'r ymdeimlad hwnnw o'r bedwaredd wal. Mae'r perfformwyr yn cyflwyno'r ddrama'n realistig, heb ddefnyddio technegau megis siarad â'r gynulleidfa neu tableau, sydd ar unwaith yn dryllio unrhyw ddelwedd o fywyd go iawn ar y llwyfan.

• Sgyrsiau a dull siarad bob dydd. Byddai drama realistig yn defnyddio rhyddiaith yn hytrach na barddoniaeth a byddai'n defnyddio iaith arferol yn hytrach na geirfa emosiynol ddwfn.
• Pobl gyffredin. Yn gyffredinol, mae'r straeon yn ymwneud â phobl y gallwn ni eu diffinio fel dosbarth canol neu ddosbarth gweithiol. I Stanislavski, y dosbarth canol, neu i ddefnyddio'r term cywir yn Rwsia ei gyfnod, bwrgeisaidd, oedd y bobl y byddai'n eu gosod ar y llwyfan ar y cyfan.
• Arddull actio wedi ei ymarfer yn ofalus sy'n creu neu sy'n cadarnhau'r argraff o realaeth. Mae hyn yn wir pa bynnag agwedd a gaiff ei mabwysiadu.
• Portread o fywyd go iawn sydd wedi ei ddethol yn ofalus a'i grisialu ond sy'n dal i fod yn effeithiol yn theatrig.
• Lleoliadau go iawn. Mae’r dramâu hyn yn cael eu gosod mewn cyd-destunau realistig. Ni fydd ganddyn nhw leoliadau hudol neu ffantasi ac maen nhw'n debygol o fod yn gyfoes. Daw amser pan na fydd drama o'r fath, un gan Chekhov er enghraifft, bellach yn gyfoes. Yna penderfyniad y cyfarwyddwr ydy sut i fynd ymlaen â'r gwaith. Ond mae mwyafrif y cynyrchiadau o waith Chekhov yn cael eu gosod yn eu cyfnod gwreiddiol gyda chymaint o wirionedd realistig yn y cynhyrchiad â phosib.