����ý

Mae bron iawn bob peth sydd ar gael ar y stryd fawr, neu mewn canolfan siopa, i’w gael ar-lein hefyd. Er enghraifft, mae archfarchnadoedd yn cynnig danfon nwyddau mae pobl yn eu harchebu drwy eu gwefan i’w cartrefi.

Mae prynu eitemau digidol a’u llwytho i lawr yn gyffredin heddiw hefyd. Mae eitemau a oedd yn arfer cael eu gwerthu ar ffurf cyfryngau ffisegol (CDs, DVDs, llyfrau) erbyn hyn yn cael eu llwytho i lawr yn syth i gyfrifiadur neu ddyfais llaw cwsmer.

Prynu nwyddau ar-lein

Mae’r broses o brynu nwyddau ar-lein fel arfer yn cynnwys:

1. pori drwy gatalog ar-lein
2. rhoi eitemau mewn rhithfasged
3. mynd i rith fan talu
4. dewis dull talu a danfon
5. cadarnhau archeb
6. cadarnhau cludiant (drwy ebost neu SMS)

Manteision

• Hwylustod - siopa o unrhyw gyfrifiadur sydd â chysylltiad rhyngrwyd unrhyw bryd a does dim angen teithio, talu am barcio, ciwio yn y siop, ac yn y blaen.
• Mwy o amrywiaeth - mwy o siopau ar-lein nag sydd ar unrhyw stryd fawr neu mewn unrhyw ganolfan siopa.
• Nwyddau rhatach - mae mwy o gystadleuaeth rhwng adwerthwyr (ar raddfa fyd-eang weithiau) yn dod â phrisiau i lawr.
• Hygyrchedd - gall pobl sydd ag anabledd sy’n effeithio ar eu gallu i symud ddewis cael nwyddau wedi’u danfon i’w cartrefi.
• Cymharu - drwy ddefnyddio’r rhyngrwyd mae’n hawdd ymchwilio’n drylwyr iawn i gynnyrch neu wasanaethau, gan gymharu prisiau a manylion cynnyrch er mwyn cael y fargen orau.

Anfanteision

• Pryderon yn ymwneud â diogelwch wrth dalu â cherdyn credyd dros y rhyngrwyd.
• Dim cyfle i archwilio’r nwyddau’n ffisegol cyn prynu.
• Nwyddau’n cael eu difrodi wrth gael eu cludo.
• Nwyddau ddim yn cyrraedd mewn pryd, neu ddim yn cyrraedd o gwbl.
• Pryderon ynglŷn â pha wybodaeth mae adwerthwyr yn eu cadw am gwsmeriaid, er enghraifft arferion prynu.