����ý

I gynhyrchu halwyn wrth adweithio asid ag alcali, rydyn ni’n defnyddio dull titradu. Bydd hyn yn cynhyrchu halwyn hydawdd.

Defnyddiau

Mae’r cyfarpar sydd ei angen yn cynnwys:

• pibed i fesur cyfaint penodol o asid neu alcali yn fanwl gywir
• llanwydd pibed i ddefnyddio’r bibed yn ddiogel
• fflasg gonigol i ddal yr hylif o’r bibed
• bwred i ychwanegu symiau bach wedi’u mesur o un adweithydd at yr adweithydd arall yn y fflasg gonigol

Dull

Dyma amlinelliad o’r dull i gynnal titradiad lle caiff asid ei ychwanegu at alcali.

1. Defnyddio’r bibed a llanwydd pibed i roi 25 cm³ o alcali mewn fflasg gonigol lân.
2. Ychwanegu rhai diferion o ddangosydd a rhoi’r fflasg gonigol ar deilsen wen.
3. Llenwi’r fwred ag asid a nodi’r cyfaint cychwynnol.
4. Ychwanegu’r asid o’r fwred yn araf at yr alcali yn y fflasg gonigol, gan ei chwyrlïo hi i gymysgu’r hydoddiant.
5. Stopio ychwanegu’r asid ar ôl cyrraedd y diweddbwynt (pan mae’r newid lliw priodol yn digwydd i’r dangosydd). Nodi’r darlleniad cyfaint terfynol.
6. Ailadrodd camau un i bump gan ddefnyddio’r un cyfaint o asid o’r fwred heb ddefnyddio dangosydd. Yna, gellir anweddu’r hydoddiant sydd wedi ffurfio i gael grisialau pur o’r halwyn.

Mae’r un dull yn gweithio i ychwanegu alcali at asid – dim ond amnewid yr hylifau sy’n mynd i mewn i’r fflasg gonigol a’r fwred.