����ý

Mae gan gronfa ddata berthynol fwy nag un tabl ac mae’r tablau’n cael eu cysylltu drwy ddefnyddio meysydd allweddol. Er enghraifft, gallai cronfa ddata llyfrgell gynnwys tri thabl:

1. Cwsmer - pan fydd cwsmer yn ymuno â’r llyfrgell bydd cofnod yn cael ei greu. Mae’n storio manylion y cwsmer, er enghraifft ei enw cyntaf a’i gyfenw, ac mae’n cynnwys Rhif Adnabod unigryw’r Cwsmer.
2. Llyfr - mae gan bob llyfr yn y llyfrgell gofnod. Mae’n storio manylion am y llyfr, er enghraifft yr awdur a’r teitl, ac yn cynnwys rhif adnabod unigryw’r llyfr.
3. Benthyca - pan fydd cwsmer yn benthyca llyfr, bydd y tabl benthyca yn storio rhif adnabod unigryw’r cwsmer a rhif adnabod unigryw’r llyfr mewn cofnod. Gallai’r cofnod hefyd gynnwys gwybodaeth ychwanegol, er enghraifft pryd gafodd y llyfr ei fenthyca a phryd mae disgwyl iddo gael ei ddychwelyd.

Mae rhifau adnabod y cwsmer a’r llyfr yn enghreifftiau o feysydd allweddol.

Manteision

• Dim ond unwaith y mae angen mewnbynnu manylion y llyfr a manylion y cwsmer i’r gronfa ddata.
• Oherwydd hyn, mae camgymeriadau’n llai tebygol o ddigwydd. Er enghraifft, pe bai cofnod cwsmer yn cynnwys camgymeriad, byddai cywiro’r camgymeriad unwaith yn golygu ei fod wedi’i gywiro ym mhob rhan o’r gronfa ddata.
• Osgoi dyblygu – mae hyn yn sicrhau nad yw ffeil y gronfa ddata yn mynd yn rhy fawr.
• Mae modd gweld manylion llyfrau a chwsmeriaid yn hawdd drwy ddefnyddio eu rhifau adnabod unigryw.
• Mae’n bosibl gwneud ymholiadau a chreu adroddiadau, er enghraifft, rhestr o lyfrau y mae cwsmer wedi’u benthyca ers ymuno â’r llyfrgell.