Llarpio'r Llewod
Mae'n ystrydeb yr ydym wedi ei chlywed hyd syrffed, bod rygbi yn grefydd yng Nghymru.
Felly, ni ddylem synnu fod y gêm yn cael sylw yn y ddau bapur enwadol, Y Tyst a'r Goleuad.
Ymdriniaeth y wasg o gemau'r Llewod sydd wedi mynd dan groen D T Lewis ac mae'n cysylltu'r don anedifeiriol o gefnogaeth i'r tîm Prydeinig ag, o bopeth, y Rhyfel yn Irac.
Eglura mai'r geiriau, "Nid yn fy enw i" sy'n cysylltu'r ddeubeth.
Slogan a oedd yn wreiddiol yn mynegi gwrthwynebiad pobl i'r penderfyniad o fynd i ryfel yn erbyn Irac.
A dyna'i union ymateb yntau, meddai, i'r don o gefnogaeth i'r Llewod ar ddalennau papurau a thonnau'r awyr.
"Hefo'r holl heip ar radio a theledu ynglŷn â thaith y Llewod Prydeinig - a rhaid cydnabod fod y cyfryngau Cymreig ar flaen y gad yn hyn o beth - mae'r un slogan yn crynhoi f'ymateb i eto - 'Nid yn fy enw i'," meddai D T Lewis.
Yn ddyn hoff o rygbi aiff ymlaen i ddweud na all ddeall sut y gall Cymry twymgalon wirioni â thîm rygbi Prydeinig ac mae'n canmol pêl-droedwyr am ymwrthod â'r un meddylfryd.
"Yn ddiweddar gwrthododd y Gymdeithas Bêl Droed yr alwad i Gymry fod yn rhan o dîm Prydeinig ar gyfer y Gemau Olympaidd yn Llundain," meddai gan ychwanegu, "Da iawn nhw."
Does dim amheuaeth bod Mr Lewis yn taro tant gyda sawl un ac fel gellid disgwyl mae'n troi ei ddadl yn ddameg grefyddol.
"Mae gwneud rhywbeth yn enw rhywun yn golygu gweithredu yn ei le ac er ei fwyn, fel cynrychiolydd iddo. Onid dyma yw hanfod Efengyl Iesu Grist?" meddai.
Bid a bo hynny, edrych ymlaen y bydd ambell un yn awr at ymateb Mr Lewis yn rhifynnau nesaf Y Tyst a'r Goleuad i Heip Lludw'r wasg a'r cyfryngau yng Nghaerdydd yr wythnos hon.
A beth fydd o'n ei wneud o'r Cymry hynny sy'n cefnogi Awstralia yn hytrach na thîm Lloegr-Cymru.
Yr hen, hen, feddylfryd honno o gefnogi mewn unrhyw ymrafael pa bynnag dim sy'n chwarae yn erbyn Lloegr.
Fyddan nhw'n plesio?
