Celpio wrth glapio
Mi fydda i'n meddwl mai'r peth anoddaf i rywun sy'n cymryd drosodd swydd rhywun arall ydi peidio ag ymddangos fel pe byddai'n feirniadol o'r sawl oedd yno o'i flaen.
Yr oeddwn i'n meddwl hyn pan gamodd Carwyn Jones i esgidiau Rhodri Morgan y dydd o'r blaen, er enghraifft.
Wrth gwrs, bod Carwyn eisiau rhoi'r wedd orau ar yr hyn mae o'n bwriadu ei wneud ond a lwyddodd o i wneud hynny heb roi'r argraff i Rhodri fod yn ddiffygiol mewn rhyw ffordd neu'i gilydd?
Wrth gymeradwyo ei ddyfodol ei hun a roddodd o gelpan lawchwith i'w raglfaenydd? Fe adawai i'r myrdd ymgynghorwyr gwleidyddol fynd i'r afael â honna.
Yr un oedd y perygl i olygyddesau newydd Taliesin - yn frwd i argyghoeddi darllenwyr y bydd y cylchgrawn yn ddeunydd darllen anhepgor yn eu dwylo hwy.
"Rydym ni'n llawn syniadau cyffrous ynglŷn â sut i anadlu bywyd newydd i'r cylchgrawn ac mae'r ddwy ohonom ar bigau i ddechrau o ddifrif ar y gwaith gan gamu'n hyderus gyda Taliesin i lygad y dyfodol," meddan nhw yn Y Cymro'r bore ma.
Hawdd iawn fyddai i rai dybio mai'r enyniad yw nad oedd gan y golygyddesau sy'n ymadael syniadau cyffrous ac nad oedd bywyd i'r cylchgrawn dan eu gofal hwy.
Peryg ydi bod rhywun yn darllen gormod i'r pethau ma - ond fe fyddai'n ddiddorol bod yno pan fydd y pedair yn cyfarfod nesaf a'r dyfyniad yna mewn ffram ar y wal.
