Twyll, dichell a darnau o bapur
Diolch i'r dechnoleg ddiweddaraf mae'n ymddangos bod hyd yn oed twyllo mewn arholiadau wedi mynd bellach yn rhywbeth sydd y tu draw i allu arbenigwyr i'w reoli.
Gyda ffonau symudol yn cael eu henwi fel yr arfau grymusaf sydd ym meddiant plant ysgol sy'n sefyll eu arholiadau TGAU a Lefel A.
Wrth gwrs, mae twyllo mewn arholiadau yn rhywbeth sydd cyn hyned ag arholiadau eu hunain - a faint ohonom all bledio'n gwbl ddieuog o'r camwedd?
Y dull yn hytrach na'r bwriad sydd wedi newid.
"Crubio," oedd gair mawr fy nyddiau i yn yr ysgol gyda nodiadau ar ddarnau o bapur yn cael eu cuddio yn eich hosan neu i fyny llewys i ymgynghori â hwy yn ddirgelaidd yn ystod yr arholiad.
Byddai ambell un yn smyglo llyfrau cyfain i arholiadau i ymgynghori'n drwsgwl â hwy dan y ddesg - obnd i gael pelten gyda'r dywededig lyfr pe byddai athro yn eich dal!
Heddiw, mae trafferth cael yr hawl i wahardd plant fynd â'u ffonau symudol i ystafell arholiad meddir.
Nodiadau beiro ar gledr llaw fyddai hen ddull arall ac ar eich braich chwith os yn sgrifennu â'r llaw dde ond yn aml iawn byddai gwres y dydd yn peri i'r inc redeg ac i'r cymorth fod yn annarllenadwy.
Hefyd, byddai'n hawdd i athro ofyn ichi ddinoethi ei braich. Ac er mwyn datrys y broblem honno y byddai merched yn sgrifennu eu nodiadau hwy dan eu sgertiau ar ran uchaf eu coesau gan wybod na fyddai'r un athro yn meiddio mentro yno!
Dull poblogaidd arall o smyglo gwybodaeth i'r ystafell oedd mewn blychau neu byrsiau pensilau ac yn nyddiau pin ac inc ar bapur blotio.
Efallai bod gennych chwithau brofiad o'r ystrywiau hyn - anfonwch air.
