Prifddinas aflengar
O'r holl erthyglau sy'n ymddangos yn y wasg Gymraeg byddai'n rhai mynd yn bell iawn i ddod o hyd i unrhyw beth difyrrach na Briwsion Bruce gan Bruce Griffiths (er na nodir hynny bob tro) yn Y Casglwr, cylchgrawn Cymdeithas Bob Owen.
O dymor i dymor caiff rhywun ei synnu faint o faeth sydd yna mewn briwsion!
Gall briwsionyn hefyd, wrth gwrs, fachu weithiau yn eich llwnc ac mi allai ddychmygu ambell un o Gaerdydd yn cael pwl cas o dagu wrth ddarllen yn rhifyn gwanwyn 2010 y cyfraniad bach hwn:
"Bum yn trafod gydag un llyfrwerthwr [yng Nghaerdydd] y syniad o gael ffair lyfrau yn y Brifddinas.
"Nid oedd yn ffyddiog iawn: ni fuasai fawr o lewyrch ar ffair lyfrau yno o'r blaen, meddai, a thybiai fod Abertawe yn ddinas fwy llengar!" meddai Bruce.
Gan ychwanegu: "Dyna her i chi ddarllenwyr Y Casglwr yng Nghaerdydd! Beth am drefnu ffair lyfrau yn ein prifddinas?"
Bydd yn ddiddorol gweld a fydd ymateb - nid yn unig i'r her ond i'r sylw pryfoclyd na fod Abertawe yn lle mwy llengar.
