Diwrnod bach
"Gwnewch y pethau bychain . . ." mae'r dywediad bron a bod yn ystrydeb genedlaethol ond ddydd Gwener yma mae gwahoddiad inni wneud yn union hynny - ar y we.
Mae gwahoddiad wedi ei estyn i bob un ohonom ni i 'wefannu' yn y Gymraeg y diwrnod hwn - os oes y fath air yn bod.
Mae dydd Gwener, Medi 3 2010, wedi ei fedyddio yn ddiwrnod y pethau bychain ac wedi ei neilltuo i ddefnyddio'r Gymraeg ar y we a dathlu'r iaith yn y byd digidol.
Mae rhagor o fanylion - ac awgrymiadau - ar y ddalen hon
Ac wrth gwrs fe fyddem ni wrth ein boddau yn derbyn gennych awgrymiadau beth ellir ei wneud a beth ydych chi'n bwriadu'i wneud.
Achos y gwir amdani yw, os bydd pawb yn gwneud rhywbeth bach mi fydd yn ddiwrnod mawr!
