Rhifyn cyntaf
Mae'r rhifyn cyntaf o Cristion dan ei olygyddiaeth newydd wedi cyrraedd. Rhifyn cyntaf y Parchedig Casi M Jones o'r Felinheli wrth y llyw.
Hithau'n brawf bod yr inc sydd yn y gwaed yn cael ei drosglwyddo o un genhedlaeth i'r llall gan ei bod yn ferch i Ned Thomas - newyddiadurwr a phen sbardunwr sefydlu papur dyddiol Cymraeg, Y Byd, nes i'r Cynulliad droi'r drol arbennig honno.
Ta beth, yn ei rhifyn cyntaf o Cristion mae Casi Jones wedi ymwrthod - gwaetha'r modd? - â'r demtasiwn o osod ei stondin ac unrhyw agenda gerbron ei darllenwyr yn ei sylwadau golygydd.
Dim ond rhestru cyfraniadau'r rhifyn sy'n cynnwys cerdd a greodd Gwyn Thomas i'r cylchgrawn.
Wele hefyd, gyflwyno colofnydd newydd, Lyn Lewis Dafis fydd yn sgrifennu dan y teitl ClirLyn.
Ef, wrth gwrs yn flogiwr poblogaidd hefyd dan yr enw sy'n medru bod yn llais pryfoclyd ar faterion eglwysig, cymdeithasol a chrefyddol gan ddisgrifio ei hun fel "derwydd a chynghorydd o Aberystwyth, Ceredigion".
Mae'r cylchgrawn yn cloi gyda detholiad o bumo o weddïau; Dros Gymdeithas y Beibl, Cyfathrebu'r Efengyl, Clywed yr Efengyl, Byw'r Efengyl - a "Dros y Diwydiant Teledu".
Y golygydd newydd nesaf i gymryd ei gadair fydd Pryderi Llwyd Jones sy'n dilyn John Gruffydd Jones yn olygydd Y Goleuad.
Mae John Gruffydd Jones yn ffarwelio yn rhifyn Medi 24.
