Wythnos galar a streic
Wythnos arall ddyfyniadau - dyma ddetholiad. Mae croeso ichi ychwanegu atyn nhw . . .
- Yr oedd o yna i bawb. Yna, yn ei awr dduaf, pan drawodd y gwaelod isaf fel ei fod eisiau cymryd ei fywyd ei hun - o na fyddai un ohonom wedi medru bod yno iddo ef - John Hartson am Gary Speed yn y 'Western Mail' ddydd Iau.
- Fe fydd yna ddigon o ddagrau ddydd Sadwrn rwy'n siŵr - Christine Williams, mam Shane, yn edrych ymlaen at y gêm yn erbyn Awstralia yfory.
- Da bo ti Shane - bu'n bleser pur. Fyddi di byth yn cael dy anghofio a dydw i ddim yn credu y gwelwn dy debyg eto - Barry John yn y 'Wales on Sunday'.
- Doeddwn i ddim wedi bwriadu am eiliad i'r sylwadau hyn gael eu cymryd o ddifrif - Jeremy Clarkson yn ymateb i'w sylwadau ar 'The One Show' yn dilyn streic dydd Mercher. "Fe fyddwn i'n eu saethu i gyd. Fe fyddwn yn mynd â nhw allan a'u saethu gerbron eu teuuoedd," meddai gan beri 4,700 o gwynion gan wylwyr.
- 90,000 - maint y golled a wnaeth Eisteddfod Genedlaethol Wrecsam, fis Awst.
- Mae pobl Aberteifi a masnachwyr y dre yn meddwl ei bod hi'n bwysig cael goleuadau Nadolig - Paul Oakley, Cadeirydd Siambr Fasnach Aberteifi, yn croesawu dychweliad goleuadau Nadolig i'r dref.
- Un cylchgrawn yn dweud mai Boris Johnson yw dyn mwyaf dylanwadol y Deyrnas Unedig. Guto Harri wedi gwneud ei waith yn iawn, felly - Madog Mwyn yn
- Efallai y dylem ddilyn esiampl yr Albanwyr a'r Gwyddeolod a sefydlu elusen ein hunain i fynd i'r afael â holl ofynion ac anghenion plant Cymru - Nici Siôn o Fethesda o'r farn, mewn llythyr yn 'Y Cymro' fod Cymru yn haeddu gwell na'r NSPCC.
- Roedd y criw i gyd yn llysgenhadon gwych tros eu gwlad. Siom, fodd bynnag, yw bod cyn lleied o sylw i hyn oll yn y cyfryngau yng Nghymru - Pedr Wynn mewn llythyr yn 'Y Cymro' wedi ei blesio gan weithgarwch aelodau o'r Urdd ym Mhatagonia.
- Slashed Wrists this Christmas - un o'r caneuon ar EP Nadolig wahanol y Super Furry Animals, Atheist Xmas.
- Pan briododd merch y tŷ fe wnaethon nhw rostio eidion i'r pentrefwyr - Y Parchedig Geraint Hughes, hanesydd leol, yn sôn am ddigwyddiadau ar ystad Penybont Hall, Maesyfed, y dywedir sy'n sylfaen i'r gyfres deledu Downtown Abbey. Yn ôl y 'Wales on Sunday' yr oedd nain yr awdur, Julian Fellowes, yn forwyn yno.
- Mi fasa'n braf meddwl y gallai rhaglenni o'r Eisteddfod gael eu dangos trwy'r hydref a'r gaeaf, fel bod mwy o bobol yn cael cyfle i'w mwynhau - Elfed Roberts, Prif Weithredwr yr Eisteddfod Genedlaethol yn gofidio fod mynychwyr yr Eisteddfod Genedlaethol yn colli rhaglenni teledu o'r Steddfod.
- Bwytewch yn araf gan roi'r gorau iddi cyn ichi deimlo'n llawn - Un o gynghorion y 'Wales on Sunday' ar gyfer colli pwysau ar gyfr y Nadolig. Dywed fod pobl dewion yn dueddol o lowcio eu bwyd.
- Llwyddodd i gyfleu neges glir er iddo golli ei lais - Huw Edwards am anerchiad yr Archdderwydd, T James Jones, yng Nghymanfa Ganu Undebol Llundain mewn adroddiad yn y wasg enwadol.
- Y peth gorau yw y ffordd mae pobl yn edrych arnaf. All pobl ddim credu'r peth pan maen nhw'n fy ngweld i - Joseff Edwards, disgybl Chweched Dosbarth ynYsgol Dyffryn Taf, Hendy-gwyn, sydd hefyd ybn gyrru bws 54-sedd i gludo plant eraill i'r ysgol. "Rwyf wrth fy modd gyrru'r bws. Mae'n hwyl go iawn - llawer gwell na'r car," meddai.
- Rwy'n credu y byddai creu adnoddau addysgiadol ar gyfer plant Cymru i amlygu effaith ofnadwy rhyfel, ffasgaeth, ac anoddefgarwch yn ddefnydd addas yr arian hwn - Huw Lewis AC, y Gweinidog Treftadaeth, yn ymateb i rodd o £300,000 a dderbyniodd y Llyfrgell Genedlaethol gan ddyn a fu'n gwasanaethu gyda'r SS yn ystod yr Ail Ryfel Byd.
- Does wybod pam ond y mae'r rhan fwyaf o bobl yn y Deyrnas Unedig yn teimlo'n reit hapus - Pennawd yn y 'Western Mail' heddiw yn dilyn cyhoeddiad y Swyddfa Ystadegau Cenedlaethol i 76% o bobl roi marc o saith allan o ddeg iddynt eu hunain wrth fesur eu hapusrwydd.
£30 miliwn - cost dybiedig achos Lynette White a ddaeth i ben mor ddirybudd ddoe.
