Trafod Môn 'da Rhun ap Iorwerth
VR; Helo Rhun
Rh; Helo Vaughan
VR; Ti'n byw ar yr ynys. Beth ar y ddaear sy'n mynd ymlaen yna?
Rh; Mae Peter Rogers wedi sicrhau'r mannau hysbysebu gorau h.y. yng nghaeau'r ffermwyr wrth y priffyrdd... felly pe bai modfeddi sgwâr o hysbysebu yn cyfri ... fo sy'n ennill! Ond dyw o ddim yn gweithio felly Vaughan!
VR; Dyw'r defaid ddim am fotio felly... ai Peter yw'r prif fygythiad i Ieuan?
Rh: Ie, ddwedwn i, ond mae'n anodd iawn darllen faint o fygythiad ydi o mewn gwirionedd. Fe allwn ni ddisgwyl i'r Ceidwadwyr wneud yn well drwy Gymru, felly dyna i ti rai Ceidwadwyr gefnogodd Peter Rogers y tro diwethaf y safodd o fel ymgeisydd annibynnol yn dychwelyd i'w corlan nhw efallai, felly fe fyddai raid iddo fo ddenu LOT FAWR o gefnogwyr newydd y tro hwn er mwyn curo Plaid Cymru.
VR; Dwy ti ddim wedi son am Lafur- nhw, wedi'r cyfan sydd a’r sedd seneddol.
Rh; Dyw Llafur erioed wedi bygwth yn Ynys Môn yng nghyd-destun etholiadau'r Cynulliad. Ond mae yna ffactorau eraill ym Môn hefyd. Er bod y sedd wedi bod yn nwylo'r pedair prif blaid, dyw'r aelod presennol ddim yn colli ei sedd yn aml. Cofia mai ar ôl i Ieuan Wyn Jones ddewis peidio â sefyll yn etholiadau San Steffan yr enillodd Lafur, nol yn 2001, a beth bynnag ydi'r cwestiynau ynglŷn â phoblogrwydd Ieuan Wyn Jones fel unigolyn, mae'r ffaith honno yn siŵr o weithio o'i blaid... os yw'r drefn draddodiadol yn parhau.
VR; Ond beth am Wylfa...
Rh: Pwynt pwysig, ac mae swyddi - Wylfa ac Alwminiwm Môn yn arbennig - yn faterion pwysig. Ond dwi'n meddwl bod y ffaith i Ieuan Wyn Jones ddweud rŵan ei fod yn cefnogi Wylfa yn profi ryw fath o gonsensws ar yr Ynys.
VR;Ieuan i ennill felly?
Rh: Mae dy flog di, dwi'n meddwl wedi rhoi Plaid Cymru'n ffefrynnau i ennill, a does gen i ddim rheswm i amau bod Karl y bwci ymhell o'i le. Ond cofia di... yn yr wythnos olaf cyn yr etholiad seneddol 2005 y gwelon ni Peter Rogers yn ennill tir dwi'n meddwl, ac os ydi o'n llwyddo i gael ei 'troops' allan eto y tro hwn, fe allai agosáu.
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Hmm..Diddorol iawn, Mr Roderick.
Ond gyda 'Right to Roam' beth sy i stopio y gwrthbleidiau yn 'hwpo' ei placardiau ei hun i fyny ar bwys y rhai sydd lan yn barod ?
Os odi 'Estate Agents' yn medru taflu eu hysbysebion i fyny blith draphlith, ar dai na ydynt yn ei gwerthu, beth sydd i stopio hwn yn digwydd yng Nghymru ??
Nid fy mod yn eisiau hwpo syniadau ym mhennau pobol..
'Dwi'n ama mai yr un ffarmwr sy berchen y tir lle mae holl baneri Mr Rogers yn ymddangos!
Mae rheolau llym iawn yn bodoli yma ar yr Ynys ynglyn a dangos posteri a.y.b, felly mwy na lai yr unig le lle gwelir posteri o unrhyw fath ydi'r placardiau mewn caeau. Ychydig iawn, iawn o bosteri a.y.b mewn ffenestri sydd i'w gweld.