Dipyn o lanast?
Mae'r drefn newydd sy'n caniatáu i'r Cynulliad ofyn am yr hawl i ddeddfu mewn trafferthion. Mae hynny'n anorfod wrth gyflwyno trefn newydd yn ôl y llywodraeth ond awgrymodd un aelod cynulliad bod y llythrennau LCO yn arwyddo Llanast Cwbwl Ofnadwy yn ogystal â Legislative Competence Order.
Dyw'r Llywodraeth a Swyddfa Cymru ddim hyn yn oed yn cytuno faint o'r ceisiadau yma sydd ar y gweill. Mae 'na ddau yn ôl Whitehall, pedwar yn ôl Bae Caerdydd.
A beth am y sefyllfa lle mae pwyllgorau'r cynulliad wedi cwblhau’r gwaith o scriwtineiddio dau gais cyn i'r Pwyllgor Dethol Cymreig yn San Steffan gychwyn ar y gwaith? Onid yw pwyllgorau'r cynulliad i fod i gymryd safbwyntiau'r Pwyllgor Dethol i ystyriaeth? Oes 'na ryw TARDIS cynulliadol sy'n caniatáu i bwyllgorau Bae Caerdydd rhagweld casgliadau eu cyd-wleidyddion?
Mae Betsan eisoes wedi blogio ynglŷn â'r amser caled gafodd Jane Hutt wrth ymddangos gerbron y Pwyllgor Dethol i gyfiawnhau’r LCO yn ymwneud ac anghenion addysgiadol arbennig. Roedd rhai o aelodau'r pwyllgor eisiau gwybod beth oedd y cynulliad yn bwriadu gwneud a'r pwerau. Cwestiwn digon rhesymol ym marm yr aelodau seneddol ond gwrthod ateb gwnaeth y gweinidog.
Amddiffynnwyd Ms Hutt gan Carwyn Jones heddiw. Dywedodd hyn; "dyw e ddim yn bosib i weinidog ddweud beth fydd y cynulliad yn gwneud gan mai i'r cynulliad y trosglwyddir y pwerau ac nid i'r gweinidog".
Wel, mae hynny'n llythrennol gywir ond y llywodraeth nid y cynulliad sydd wedi gwneud y cais. Oni allai'r gweinidog rhoi rhyw syniad bach o'r hyn oedd mewn golwg? Un cliw bach i'r Pwyllgor Dethol, plîs?
Ar ben hyn oll mae'r holl broses eisoes yn arafu gydag amheuon cynyddol na fydd y Pwyllgor Dethol yn gallu delio a'r holl geisiadau. Y disgwyl oedd y byddai'r broses yn cymryd rhyw chwe mis eisoes mae'n amlwg y gallai sicrhâi LCO gymryd hyd at flwyddyn.
Ydy'r llywodraeth yn becso? Efallai. Mae 'na rwystredigaeth wrth reswm. Ar y llaw arall pe bai'r gyfundrefn yn troi'n llanast llwyr fe fyddai'n cryfhau'r dadleuon dros bleidlais gynnar ar bwerau deddfwriaethol llawn.
Fe fydd na mwy am hyn ar CF99 nos yfory.
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
