Joe a German
Oce, dw i'n gwybod bod y gymhariaeth yn un cwbwl rhyfedd ond dyma gwestiwn i chi. Ai Mike German yw Joe Calzaghe gwleidyddiaeth Cymru?
Dros y mis diwethaf mae Democratiaid Rhyddfrydol Cymru wedi bod yn cynnal ei fersiwn nhw o "re-unification bout" i sicrhâi bod gan y Blaid un arweinydd cyhoeddus yn unig yn y dyfodol yn lle'r cawlach o gael arweinydd Cymreig nad oedd yn Aelod Cynulliad.
Wrth gwrs dyw Mike ddim wedi gorfod paffio am ei wobr ar ôl i Lembit ddewis sefyll o'r neilltu a hongian ei felt yn wardrob Gabriella. Mae'r teitl yn dipyn o wobr gysur mewn gwirionedd gan fod Mike wedi ei ethol yn ddiwrthwynebiad ar yr amod ei fod yn rhoi'r twls ar y bar ymhen rhyw flwyddyn.
Yn y cyfamser mae'r Blaid yn cynnal etholiad sydd hyd yn oed yn llai diddorol na'r ras rhwng Chris Huhne a Nick Clegg i ddewis llywydd newydd y Blaid yng Nghymru. Y cyn AC Christine Humphries, yr Athro John Last a'r Cynghorydd Bob Barton yw'r ymgeiswyr. Eisiau gwybod mwy? Doeddwn i ddim yn credu eich bod chi! Serch hynny mae'r swydd yn gallu bod yn un pwysig. Ym marn llawer, stranciau'r cyn-lywydd "Red Rob" Humphreys oedd yn bennaf gyfrifol am dranc yr enfys.
Cyn belled a mae Mike druan yn y cwestiwn mae "Arweinydd Democratiaid Rhyddfrydol Cymru" yn deitl digon dymunol ond dim hanner cystal â dirprwy brif weinidog!
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Pwy yw 'y cyn AC Christine Humphries?' Mae gen i rhyw gof mod i wedi clywed yr enw o'r blaen ond fedrai ddim cofio dim mwy amdani. Fedri di fy ngoleuo? A tra fyddi di wrthi, pwy yw'r ddau arall?
Fe gynrychiolodd Christine ranbarth y Gogledd yn y cynulliad cyntaf cyn ymddeol am resymau iechyd. Mae'n Gymraes Gymraeg o Lanrwst. Cynghorydd o Sir Ddinbych yw Bob Barton. Dw i ddim yn nabod y trydydd ymgeisydd ond mae'n debyg ei fod yn ymgyrchu fel "tecnocrat" fydd yn gwella trefiadaeth y Blaid