Ar brawf
Mae Alun Cairns yn ôl wrth ei waith heddiw gyda'r rhan fwyaf o'r aelodau cynulliad yr ydw i wedi siarad â nhw yn mynegi cryn gydymdeimlad â fe. Mae 'na rywbeth eithaf arswydus am ba mor ofalus y mae gwleidyddion yn gorfod bod. Gall deg eiliad o ffolineb ddryllio blynyddoedd o waith a phan mae hynny'n digwydd i un aelod mae'n naturiol efallai bod aelodau eraill yn ochri a'u cyd-wleidydd.
Beth sy'n debyg o ddigwydd nesaf felly? Wel, mae ffawd Alun i raddau helaeth yn dibynnu ar y blaid ganolog yn Llundain. A fydd 'na faddeuant iddo fel ymgeisydd seneddol ym Mro Morgannwg? Cawn weld ond mae 'na ambell i beth o'i blaid.
Yn gyntaf mae'r ffaith na fu gwleidyddion o bleidiau eraill yn unfryd wrth ei gondemio o gymorth iddo. Mae'n anodd credu efallai ond gallai'r ffaith bod gwleidyddion fel Paul Flynn a Russell Goodway wedi cyhuddo'r Ceidwadwyr o or-ymateb gyfri. Yn sicr, os oeddwn i yn rhoi cyngor i Alun fe fyddwn yn awgrymu ei fod yn ceisio sicrhâi bod rhai o'r disgrifiadau hael ohono gan ei wrthwynebwyr yn cael eu gweld gan gadeirydd y blaid Caroline Spelman.
Mae sefyllfa'r Cadeirydd ei hun hefyd yn berthnasol. Mae'r comisiynydd safonau newydd gyhoeddi ymchwiliad llawn i'r cyhuddiadau yn eu herbyn. Ydy Mrs Spellman mewn sefyllfa i gynnal gwrandawiad buan neu i fod yn llawdrwm wrth ystyried yr achos pan mae'n bosib y bydd hi ei hun yn gorfod pledio am faddeuant cyn bo hir?
Mae helyntion Alun wedi hawlio'r sylw dros y dyddiau diwethaf gan olygu ein bod ni newyddiadurwyr wedi treulio llai o'n hamser yn croniclo'r trafferthion sy'n wynebu'r Llywydd yn sgil ei alwad am foicot o ymweliad llysgennad Israel.
Fe fu'r grŵp Llafur yn trafod y sefyllfa heddiw ac mae'n ymddangos bod yr anniddigrwydd ynglŷn ag ymddygiad Dafydd El yn parhau i ffrwtian. Yn ôl un aelod Llafur does 'na ddim mwyafrif eto o blaid ceisio diorseddu'r Llywydd ond mae'r mater yn sicr o gael ei drafod eto cyn bo hir. Yr hyn sydd angen meddai'r aelod yw i Dafydd sylweddoli nad yw bod yn Llywydd y cynulliad yn gyfystyr a bod yn Arlywydd Cymru
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
