Grandstandio
Nawr mae hwn yn ddatblygiad diddorol.
Rwyf wedi trafod hynt a helynt yr LCO iaith droeon o'r blaen gan awgrymu y gallai'r newid personél yn Swyddfa Cymru olygu y bydd y gorchymyn yn fwy cynhwysfawr na'r disgwyl. Roedd llawer o'r problemau ynghylch y gorchymyn gwreiddiol yn deillio o bryderon personol Paul Murphy yn hytrach nac unrhyw wrthwynebiad mawr ar lawr gwlad neu ar lawr Tŷ'r Cyffredin.
Mae 'na arwyddion wedi bod ers talwm bod y Pwyllgor Dethol yn llawer llai gwrthwynebus tuag at fesur eang nac roedd rhai yn darogan ond beth am Aelodau Seneddol eraill o Gymru?
Roeddwn i bron wedi anghofio am fodolaeth y pwyllgor Cymreig arall yn San Steffan sef yr Uwch-bwyllgor sy'n cynnwys holl aelodau Cymru. Sop i gefnogwyr datganoli yn y chwedegau oedd yr Uwch-bwyllgor ac ers tro mae sawl un wedi amau ei werth. "Mired in failure and futility" oedd disgrifiad Paul Flynn ohono.
Nawr mae Swyddfa Cymru wedi penderfynu gosod adroddiad y Pwyllgor Dethol ar yr LCO gerbron yr Uwch-bwyllgor ar Orffennaf 8fed. Does dim rheswm cyfansoddiadol dros wneud hynny ac o safbwynt y broses mae'n gam diystyr.
Y peth pwysig yw hwn. Pe bai na anghytundeb sylfaenol rhwng y Pwyllgor Dethol a Phwyllgor Deddfwriaeth y Cynulliad, sydd wedi galw am orchymyn cryfach, go brin y byddai'r sesiwn yma'n cael ei chynnal. Cyfle i bob aelod seneddol gael ei weld yn gwisgo cenhinen yn ei gap- beth bynnag sydd yn ei galon- yw'r cyfarfod yma.
Fe fydd yr LCO terfynnol gyda llaw yn cael ei ystyried ar lawr TÅ·'r Cyffredin. Dyma'r tro cyntaf i hynny ddigwydd gyda LCO a'r y tro cyntaf i'r iaith Gymraeg gael ei thrafod ar lawr y TÅ· am 16 mlynedd. Onid yw'r ffaith syml honno yn gythraul o ddadl gref o blaid yr LCO?
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
