Yn hapus wrth ymyl y lli...
Os oeddech chi'n gwylio'r lluniau teledu o David Cameron ar stepiau'r senedd ddoe roedd hi'n anodd peidio sylwi ar Nick Bourne yn gwenu o glust i glust. Roedd y canlyniad yn rhoi rheswm iddo wenu wrth gwrs - ond nid buddugoliaeth ei blaid oedd yr unig beth i lonni ei galon. Yn sgil y canlyniad mae'n anodd credu nad yw ei afael ar yr arweinyddiaeth bellach yn gadarn. Ymhen rhai dyddiau fe fydd Jonathan Morgan yn amlinellu ei weledigaeth e ynghylch dyfodol y Ceidwadwyr yng Nghymru mewn darlith gyhoeddus. Ydy e'n gorfod ail-sgwennu darnau o'i araith tybed?
Peth peryg yw "Twitter" lle mae rhywun weithiau yn postio'n ddifeddwl. Mae Peter Black yn canu fel cana'r aderyn heddiw. Daeth "tweet" ganddo rhai munudau yn ôl yn dweud hyn "I am watching a statement on 'Dairy Farmers of Britain'' and wondering why the minister missed out the Great". Mae 'na ateb syml, Peter. "Dairy Farmers of Britain" yw enw'r cwmni nid "Dairy Farmers of Great Britain". Mae "tweet" yn gallu troi yn "twit" weithiau!
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
