Cod da Vinci
Fe fyddai rhywun yn credu y byddai aelodau cynulliad y gogledd wrth eu boddau a'r newydd fod Prifysgol Bangor yn gobeithio agor ei chanolfan gelfyddydau a gwyddorau newydd yn 2012.
Nid felly mae pethau a nid dim ond yr enw siwdo-eidalaidd "Canolfan da Vinci" sydd wedi eu cythruddo. Yng ngeiriau un "does gen i ddim ffydd ynddyn nhw". Y "nhw" yw awdurdodau'r Brifysgol a sail yr amheuon yw'r hyn ddigwyddodd i Theatr Gwynedd.
Y Brifysgol oedd yn berchen ar adeilad y Theatr ond roedd yn cael ei rhedeg gan fwrdd annibynnol. Yn ôl un ddylai wybod dangosodd awdurdodau'r coleg fawr o ddiddordeb yng ngwaith y Theatr nac unrhyw ymroddiad iddi.
Dyw'r sgeptigiaid yn y Bae ddim yn credu bod panjyndryms Bangor yn sydyn wedi datblygu diddordeb ysol mewn cyflwyno'r celfyddydau i drigolion lleol. Yn eu barn nhw ffordd o gael llond bwced o bres cyhoeddus yw'r theatr newydd. Y gwir bwriad yw datblygu adeilad a fydd o lawer mwy o werth i'r Brifysgol a'i myfyrwyr nac i bobol y cylch a'r theatr broffesiynol yng Nghymru.
Mae Canolfan Gelfyddydau Aberystwyth yn enghraifft ardderchog o'r ffordd y mae coleg yn gallu datblygu canolfan sydd o bwys cenedlaethol ac yn gaffaeliad i'w hardal. Mae 'na fwy nac un aelod cynulliad sy'n amau nad canolfan felly fydd Canolfan Dan Brown da Vinci. Maen nhw'n benderfynol o beidio gadael i hynny ddigwydd.
Roedd pobol arfer dweud bod y "Coleg ar y Bryn" wedi adeiladu ar dir uchel er mwyn i'r penaethiaid gallu edrych i lawr ar bawb o'i gwmpas. Yn ôl rhai dyw pethau ddim wedi newid!
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Cofier un peth : Roedd staff ac awyrgylch Theatr Gwynedd yn Gymreigaidd iawn. Mae 'canolfan y celfyddydau''n cael ei gydnabod i fod yn un o sefydliadau mwyaf Seisnig Aberystwyth .