Dyna dderyn hardd wyt ti...
Does a wnelo'r nesaf ddim byd a gwleidyddiaeth ond mae'n rhy dda i beidio rhannu.
Yn y Llys Ffederal yn Sydney mae rhai o fargyfreithwyr gorau a drytaf Awstralia yn dadlau ynghylch tarddiad cân werin Gymraeg. Yn fwy penodol mae'r llys yn ystyried y cwestiwn dwys "p'un ddaeth gyntaf y deryn du neu'r Kookaburra?"
Cwmni o'r enw Larrakin Music sydd wedi dwyn yr achos gan honni bod record enwog Men at Work, "Down Under", yn cynnwys rhannau o dôn y gân "Kookaburra Sits in an Old Gum Tree". Larrakin sy'n berchen ar hawlfraint y gân.
Nonsens yw hynny medd Men at Work. "Dacw di yn eistedd aderyn du" yw'r dôn yn ôl cyfreithwyr y band. Cyfieithiad yw "Kookaburra" ac mae Larrakin wedi bod yn camhawlio arian am ei defnyddio ers degawdau. Dydw i ddim yn gwybod pwy sy'n iawn. Efallai bod pobol Tŷ Siamas yn gallu helpu!
Ta beth mae ychydig o "track record" gan Awstralia yn hyn o beth. Mae 'na gythraul o debygrwydd rhwng "Waltzing Matilda" a'r gân Albanaidd "Thou Bonnie Wood Of Craigielea" ac mae rhannau o'r anthem genedlaethol "Advance Australia Fair" yn bur debyg i "God Bless The Prince of Wales". Cofiwch, rwy'n amau bod sawl un yn ddigon parod iddyn nhw gael honna!
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Aha!
mae hwnna yn esbonio dipyn - bu i mi dderbyn ambell i neges o Awstralia yn ymholi ynghylch caneuon gwerin Cymraeg yn ymwneud ag adar du(!) tua deunaw mis yn ol, pan oeddwn i'n gweithio yn Nhy Siamas.
Galla i ddim cofio yr union ymholiad - mi wna i ofyn i ffrindiau yno. Ond gwn na wnes i rhoi esboniad ddigon clir i'r ymholwyr.
Mered fyddai'n gwybod.
...mae croeso iddyn nhw gael y dyn ei hun.