Tua'r Gorllewin
Un pwnc sy ddim wedi cael llawer o sylw'n ddiweddar yw'r ras i olynu Rhodri Morgan. Na nid yr yna, y llall! Pwy fydd yn cael yr enwebiad Llafur yng Ngorllewin Caerdydd nawr bod yr ymgeisydd amlwg, Eluned Morgan wedi tynnu ei henw allan o ystyriaeth
Does dim prinder enwau'n cael eu crybwyll. Yn eu plith dau o spads y Llywodraeth Mark Drakeford a Sophie Howe. Mae cyn arweinydd Cyngor Caerdydd, Russell Goodway yn gynghorydd yn yr etholaeth. Yn ôl y son mae Ramesh Patel wnaeth lwyddo i gadw Treganna allan o ddwylo Plaid Cymru, tra roedd wardiau cyfagos yn syrthio fel dail hefyd yn llygadu'r enwebiad.
Efallai eich bod yn cofio i'r Cynghorydd Patel fynd i drafferth ar ôl disgrifio cynlluniau i ymestyn Ysgol Gymraeg Treganna ar draul ysgol Saesneg leol fel "ethnic cleansing". Mae'r cynllun hwnnw ar ddesg y Gweinidog Addysg ar hyn o bryd ac mae'n bosib nad yw'r penderfyniad wedi ei gyhoeddi oherwydd ofnau y gallai ynghylch y pwnc fod yn sail i adolygiad barnwrol. Gwell yw aros tan iddo fynd yw'r rhesymeg, efallai!
Mae'n sicr bod y Gweinidog Addysg presennol Jane Hutt yn deall sensitifrwydd y sefyllfa. Wedi'r cyfan roedd hi ar un adeg yn cynrychioli ward cyfagos Glanyrafon ar y cyngor. Mae Jane yn debyg o golli ei lle yn Cabinet wythnos nesaf. Un o'i holynwyr posib yw Leighton Andrews. Nawr, atgoffwch fi i ba ysgol yr oedd plant Leighton yn mynd...
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Dw i ddim yn deall at beth dych chi'n cyfeirio pan dych chi'n son am sylwadau Rhodri Morgan.
Mae'n flin gen i, Rhobat. Cyfeirio at ymateb Rhodri i sylwadau Ramesh oeddwn i. Dyma'r ddolen; Rwyf wedi ychwanegu'r ddolen at y post i'w gwneud yn fwy eglur
Dydy'r linc ddim yn gweithio.
Sori Vaughan mae hwn yn hollol "off subject" ond allai ddim meddwl am ffordd arall o gael ateb i'r cwestiwn. Rwyf newydd gael sgwrs gyda fy ngwraig lle ddwedais i fod ffermwyr wedi lladd buwch tu fas i bencadlys y Swyddfa Gymreig (neu efalle yn amser y Cynulliad oedd e) ym Mharc Cathays fel rhan o brotest yn erbyn y gwaharddiad BSE. Doedd hi ddim yn credu fi. Ydw i'n mynd yn wallgof neu ydych chi'n cofio'r achlysur hefyd? Os felly, gallech chi bostio dolen i'r stori ar y we?
Ydw, roeddwn i yno! Yn ystod helynt y cwotau llaeth digwyddodd y peth os gofia i'n iawn. Yr hyn wnaethon nhw oedd dympio corff buwch farw ar stepiau hen adeilad y Swyddfa Gymreig. Roedd hi'n amlwg i gyflwr yr anifail ei bod wedi ei lladd neu wedi trigo yn ddiweddar iawn ond dwn i ddim am amgylchiadau'r farwolaeth.