 |
|
Cyfrol
sy'n sgorio!
Cyfrol wych i fynd gyda chyfres deledu am bêl-droed
Dydd Iau, Ionawr 30, 2002
|
• Sgorio. Golygydd, Emyr Davies. Nant/Y Lolfa
ac S4C. £4.95, rhyfeddol o resymol
Adolygiad gan Gwyn Griffiths
Cyfrol ysblennydd ei gwedd a difyr ei deunydd darllen yw Sgorio
- fe wna anrheg iawn i’r gwr neu’r cariad, sydd ddim yn rhy llengar
ond yn dwli ar bêl-droed.
Dweud y gwir, ’dyw’r deunydd darllen ddim yn ffôl o gwbl.
Diddorol cofio cychwyn y rhaglen deledu o’r un enw.
Er bod tipyn o amheuaeth ymhlith pwysigion S4C a fyddai rhaglen o
uchafbwyntiau gemau pêl-droed yr Eidal a Sbaen yn cydio onid oedd
Mark Hughes yn chwarae yn Barcelona, Ian Rush yn Juventus a John Toshack
yn hyfforddi Real Sociedad?
Felly yr oedd yn werth rhoi cynnig arni - mewn cyfnod pan nad oedd
llawer o bêl-droed ar y teledu beth bynnag. Dim, mewn gwirionedd,
pan ddechreuodd Sgorio.
Syniad a gydiodd
Cafodd pobol S4C haint pan ddaeth Sparky a Rushie adref cyn i’r gyfres
gychwyn. Ond, er mor anodd credu hynny, Sgorio oedd yr unig
raglen bêl-droed ar deledu ym Mhrydain am y mis cyntaf pan ddechreuodd
y gyfres.
Beth bynnag, fe gydiodd y syniad. Rwy’n cofio mynd i fwyty Eidalaidd
yng Nghaerdydd a’r perchennog yn ein clywed yn siarad Cymraeg. "Sgorio,"
gwaeddodd. Yr unig air Cymraeg a wyddai.
Mwynhad Rush
Roedd chwaraewyr Lerpwl ac Everton yn wylwyr cyson ac y mae Arthur
Emyr, mewn cyfweliad difyr iawn, yn dweud i’r Sun ddyfynnu
Ian Rush gan ddweud ei fod yn "mwynhau’r iaith a’r gystrawen".
Mae portreadau o chwaraewyr yma - Raul Gonzalez, Rivaldo, y rheolwr
John Toshack, y chwaraewr a’r rheolwr Mark Hughes.
Mae'r portread o Tosh yn un cynnes a dadlennol.
Ef oedd yr ieuengaf erioed i chwarae i Gaerdydd, gyda llaw ac yn Gymro
i’r carn o hyd. "No soy Inglese soy Galese," fel y bydd yn atgoffa
newyddiadurwyr sy’n ei alw’n Sais.
Ond os setlodd Tosh yn hapus dramor, nid felly Mark Hughes yn Barcelona.
Chwaraewr ffrwydrol ar y cae, cymeriad mewnblyg a thawel oddi arno.
"Cymro ifanc dryslyd nad oedd yn dymuno bod yno beth bynnag."
Mae’r bennod ar elyniaeth - a gwleidyddiaeth - Barcelona a Real Madrid
werth ei darllen.
Y cawr tyner
Mae pennod gan Morgan Jones ar y mwyaf ohonynt oll - "Il buono
gigante" - John Charles, y cawr tyner; hanes blwyddyn Ian Rush
yn Juventus; stori ryfeddol Gorgio Chinaglia, a fagwyd yng Nghaerdydd,
a chwaraeodd i Lazio a’r Eidal ac sy’n berchen ei sianel deledu leol
ei hun.
 Sut
collodd Cymru hwnna?
Mae Bayern Munich a’r Bundesliga yma …
Ar y diwedd mae pennod Y Carwyr - secs, meddwn innau. Ond na.
Storïau doniol y rhai fyddai’n mynd trosodd i Madrid i ’nôl tapiau
gemau’r Primera, i Rufain am dapiau y Serie A a Munich
ar gyfer y Bundesliga.
Gyda llaw, cludwyr neu cariwyr hyd yn oed - nid carwyr.
Wedi dweud hynny mae’n gyfrol secsi a hwyliog.
• Holi Emyr Davies -
Oes gennych chi farn am y llyfr hwn neu lyfrau eraill?
Ebostiwch
|
|
|
Gair
am air
Siart
Cymru
Llyfrau
ar y We
Nôl
i'r archif
