Mae ne frawddeg, pennawd, digwyddiad, a llinell o farddoniaeth wedi bod yn troi yn y mhen i y dyddie dwetha ma, a maen nhw'n trio deud rhywbeth wrtha i.
Y frawddeg
Un o bregeth glywais i erstalwm gan y diweddar Meurwyn Williams, oedd o'n deud y drefn ein bod fel cenedl yn ffraeo am rywbeth o hyd.
Ei destun oedd ymosodiad Babilon ar y genedl Iddewig ac medde fo fel tase fo'n methu coelio'r peth - y genedl wedi ymrannu a'r gelyn, milwyr Babilon wrth y pyrth.
Darlun o Gymru medde fo. Ydio'n ddarlun gwir heddiw tybed?
Y pennawd
Un Lyn Ebenezer yn Y Cymro, "Beirniad ydw i nid gelyn".
Pennawd pwysig. Mae ne ymgecru y dyddie yma dros fesur yr iaith, dros y toriade sydd ar ddod, dros gynllunie newydd byd amaeth, dros gau ysgolion ac ail drefnu addysg.
Ac mae anghytuno a beirniadu adeiladol yn iawn ac yn bwysig.
Ond gwyliwn ni i feirniadaeth droi yn elyniaeth. Pan glywa i eirie fel bradwr a sinistr a chynllwynio dwi'n teimlo bod y beirniad yn troi yn elyn ac mae gelyniaeth at ein gilydd yn gwanhau'r genedl.
Y digwyddiad
Cyhoeddi'r Eisteddfod Genedlaethol yma yn Wrecsam.
Digwyddiad pwysig ar ddechre mis o ddigwyddiade arbennig, eisteddfod Llangollen yr wythnos yma, y sioe frenhinol mewn pythefnos, yr eisteddfod genedlaethol yng Nglynebwy ymhen y mis.
Uchel wylie pwysig y genedl i gyd yn cael eu cynnal nid trwy ymgecru ond trwy gydweithio, am fod pobol yn gallu bod yn gytun.
Pe bai ne elynieth yn codi ei phen yn y pethe hyn mi fydden yn marw, fel y bydd y genedl yn marw os na fedrwn ni fod yn unol.
Mae'r gelynion yn dal o gwmpas cofiwch.
Y llinell
Un o gerdd gan Islwyn yw'r llinell.
Mae'r oll yn gysegredig.
Mae ynddi neges i bawb, yn arbennig os meiddia i awgrymu i newyddiadurwyr cyfrynge a chylchgrone'r genedl sy weithie'n pesgi ar anghytuno a ffraeo.
Cofiwch mai Cymry ydych chi a bod y genedl yn bwysicach na newyddiaduriaeth, a bod popeth yngl欧n 芒'r genedl yn bwysig, yn wir yn gysegredig.
Brawddeg, pennawd, digwyddiad, llinell. Maen nhw'n trio deud rhywbeth wrtha i.
Yden nhw'n deud rhywbeth wrthoch chi?
