Adnabod y chwiliwr
Tybed sawl un ohonoch chi sydd wedi defnyddio cyfrifiadur y bore 'ma? Os ydych chi, mi alla i fentro bod y rhan fwyaf ohonoch chi wedi defnyddio peiriant chwilio'r we wrth wneud hynny.
Roedd eitem ar y newyddion y diwrnod o'r blaen yn dweud fod yr hyn rydan ni'n chwilio amdano ar y we yn gallu dweud llawer amdanom fel unigolion, fel grwpiau o bobl ac fel gwledydd, hyd yn oed.
Pa un 芒 ydi hynny'n wir ai peidio, un ffaith na all neb ei gwadu ydi ein bod ni'n greaduriaid sy'n chwilio ac mae'r we fyd eang wedi hwyluso'r gwaith hwnnw'n fawr iawn.
Wedi helpu
Gyda'r tywydd oer yn amharu ar drefniadau siopa Nadolig eleni, mae'r we a'i pheiriannau chwilio wedi helpu sawl un ohonom i ddod o hyd i anrhegion ac, wrth gwrs, mae modd chwilio bedair awr ar hugain y dydd.
Wrth feddwl am yr hyn a ddigwyddodd yn ystod y Nadolig cyntaf hwnnw, efallai y cofiwn ni am y rhai a fu'n chwilio bryd hynny.
Cael eu siomi
Mae traddodiad yn nodi mai tri oedd yn chwilio a bod y tri ohonyn nhw'n ddoeth. Faint bynnag oedd yno, a beth bynnag oedd eu galluoedd, mi wnaethon nhw ddefnyddio un o gyfryngau chwilio'r oes a dod yn eithaf agos at y nod drwy ddilyn y seren.
Ond o gyrraedd y cyffiniau, mi roddon nhw ddau a dau at ei gilydd a chael pump. Chwilio yn y lle mwyaf amlwg wnaethon nhw, a chael eu siomi.
Fel ninnau ar y we heddiw, roedd gofyn mireinio tipyn ar eu hymchwil i ddod o hyd i'r hyn oedd ganddyn nhw dan sylw.
Beth fyddwch chi'n chwilio amdano'r Nadolig hwn? Llawenydd? Cwmni? Llonydd? Mymryn o ddistawrwydd? Y synnwyr hwnnw o 'Dangnefedd', sydd mor anodd ei ddiffinio?
Yn y lleoedd annisgwyl
Beth bynnag fyddwch chi'n chwilio amdano, alla i ddim ond gobeithio y dewch chi o hyd iddo.
A pha bynnag gyfrwng a ddewiswch i wneud y gwaith chwilio, efallai'n wir y byddai o werth i chi chwilio yn y mannau mwyaf annisgwyl na fyddant o reidrwydd yn hysbys i bawb.
