|  |
Teyrnged llywydd i Norah Isaac
 Talwyd teyrnged i Norah Isaac gan lywydd llys yr Eisteddfod Genedlaethol yn syth wedi i'r newyddion am ei marwolaeth gyrraedd y Maes fore Sul.
Dywedodd R. Alun Evans er cyn dristed y newyddion ei bod yn weddus mewn un ffordd i'w marwolaeth ddod "yn swn yr Eisteddfod."
Yr oedd Norah Isaac yn un o'r eisteddfodwyr mwyaf pybyr ac am oes o wasanaeth i'r Brifwyl fe'i dyrchafwyd yn un o ddim ond pum Cymrawd.
Mewn cynhadledd i'r Wasg fore Sul dywedodd R. Alun Evans: "Mae heddiw yn ddiwrnod trist ac mae'n od mewn rhyw ffordd disgrifio gwraig mor fach - a bregus o ran iechyd yn ystod y blynyddoedd diwethaf - fel cawres, ond dyna oedd hi."
Un o nodweddion Norah Isaac oedd ei ieuengrwydd rhyfeddol ac wrth gyfeirio at hyn dywedodd Mr Evans: "Yr oedd hi wedi cadw'n ifanc oherwydd ei bod y n byw yng nghwmni pobl ifainc gydol ei hoes."
Er yn ddi-flewyn ar dafod a chroyw ei barn yr oedd Norah Isaac yn berson poblogaidd ar faes yr Eisteddfod a dywedodd R. Alun Evans i'r ymateb i raglen deyrnged iddi yn Eisteddfod Llanelli fod cymaint y bu'n rhaid ei llwyfannu eilwaith.
"Mae'n weddus mewn ffordd ei bod hi wedi cael mynd yn swn yr Eisteddfod. Yr oedd hi yn berson yr oedd bod yn Gymrawd yr Eisteddfod yn golygu rhywbeth iddi."
Dywedodd cyfarwyddwr yr Eisteddfod, Elfed Roberts, i Norah Isaac ddweud wrtho ef mai ym mis Awst y byddai blwyddyn Norah Isaac yn cychwyn. "Yr eisteddfod oedd dechrau ei blwyddyn," meddai..
Stori y byddai Norah Isaac ei hun yn hoff iawn o'i hadrodd amdani ei hun fyddai un amdani'n blentyn yn ennill yn y Genedlaethol a chyd-bentrefwyr o glywed iddi ennill yn y National yn tybio mai buddugoliaeth yn y Grand National a gafodd!
|
|
|
|
