´óÏó´«Ã½

Wedi treulio'i flynyddoedd cynnar yn Ysgol Gynradd Cricieth ac Ysgol Eifionydd, Porthmadog, aeth Gwyn i Goleg Celf Wrecsam ac yna astudiodd ymhellach yng Ngholeg Celf Caerdydd cyn cychwyn ar ei yrfa fel athro Celf a Dylunio, yn Lerpwl i gychwyn ac yna yn Ysgol Bryn Elian, Hen Golwyn, gyrfa a barhaodd am gyfanswm o 33 blynedd.

Mae'n dal ym myd addysg gan ei fod erbyn hyn yn diwtor rhan amser mewn Celf a Dylunio yng Nghanolfan Ddydd Llys Elian, Bae Colwyn, ond bydd hefyd yn treulio cyfran helaeth o'i amser hamdden yn paentio. Gydag olew neu baent acrylig y byddai'n arfer paentio ond yn ddiweddar bu hefyd yn arbrofi gyda dyfrliw a dyna'r cyfrwng a ddefnyddiodd ar gyfer cynhyrchu'r casgliad hwn o'i waith. Gall hyn fod yn gryn her ar brydiau, meddai, gan ei fod yn ddull hollol wahanol o baentio ac nid yw mor hawdd cywiro camgymeriad - hefyd gall fod ychydig yn ddiflas disgwyl i'r lliwiau sychu cyn gweld y gwaith terfynol!

Yma yn Eifionydd, 'y fro rhwng môr a mynydd', y bydd yn cael yr ysbrydoliaeth i baentio gan amlaf. Bydd yn dychwelyd at ei wreiddiau bron bob penwythnos gan fod ganddo deulu agos yn dal i fyw yn yr ardal - ei fam yng Nghricieth, a'r ddwy ferch - Siân yn wraig i Alwyn, Fferm Trefan, Llanystumdwy, a Gwenan, yn wraig i Geraint, Llystyn Canol, Garndolbenmaen. Mae gan y ddwy ohonynt blant ifanc a bydd chwech o wyrion bach yn falch iawn o weld taid.

Nid yw'n rhyfedd felly bod yr arddangosfa yn cynnwys yn bennaf baentiadau o fannau fel Cwm Pennant, Moel Hebog, Ynys Cynhaearn, Talhenbont, Afon Dwyfor a Thraeth Cricieth. Yn y llun uchod, gwelir rhai o'i baentiadau o'r ardal hon yn y cefndir.

Gobeithio y bydd nifer fawr o bobl yn manteisio ar y cyfle i weld yr arddangosfa a thrwyddynt yn mwynhau harddwch a thawelwch Eifionydd - yng ngeiriau'r arlunydd ei hun - "Rwy'n gobeithio bod yr arddangosfa yna'n cyfleu llonyddwch a'r teimlad o 'fod yno' i'r sawl sy'n edrych ar y lluniau"

Mae cardiau o rai o'r gweithiau hyn ar werth mewn siopau yng Nghricieth a Phorthmadog ac yn Swyddfa Bost Pantglas.