´óÏó´«Ã½

Fe wnaeth tua 500 o bobl fynychu cyfarfod ym Mhwllheli i drafod bwriad bwrdd iechyd i gau ward, am gyfnod dros dro, yn Ysbyty Bryn Beryl.

Cafodd y cyfarfod ei drefnu gan gynghor y dref.

Yn gynharach y mis hwn cyhoeddodd Bwrdd Iechyd Prifysgol Betsi Cadwaladr y byddai ward yn cau dros dro a 15 gwely yn diflannu.

Fe fydd hyn yn dod i rym yr wythnos nesaf.

Mae'r newidiadau yn yr ysbyty lleol yn rhan o gynlluniau y bwrdd iechyd yn y gogledd.

Eu bwriad yw creu newidiadau sylweddol i'r gwasanaethau sy'n cael eu cynnig yn rhai o'r ysbytai cymunedol a sicrhau y bydd mwy o welyau yn cael eu darparu yn ysbytai mwya'r gogledd.

Bydd tair uned mân ddamweiniau yn cau dros dro ac mi fydd yna gwtogi ar oriau unedau eraill yn ogystal â chau ward Llŷn yn Ysbyty Bryn Beryl a hynny o Ionawr 2 ymlaen.

"Roedd yn rhaid i ni atgyfnerthu ein gwasanaethau er mwyn sicrhau ein bod yn gweithio yn effeithiol," meddai llefarydd ar ran y bwrdd.

"Daw hyn oherwydd bod disgwyl cynnydd yn y galw am wasanaethau yn ystod misoedd yn y gaeaf - tra bod yna broblemau gyda salwch staff a recriwtio yn ogystal â'r sefyllfa ariannol."

Ond yn ôl Maer Pwllheli, y Cynghorydd Mike Parry, mae cau ward gyfan yn Ysbyty Bryn Beryl yn "fater pwysig a phryderus i'r ardal gyfan".

Fe fydd y gwelyau o Fryn Beryl yn cael eu trosglwyddo i Ysbyty Eryri yng Nghaernarfon ac Ysbyty Gwynedd ym Mangor.

Bydd yr uned fân ddamweiniau yn Ysbyty Bryn Beryl ar agor o ddydd Llun i ddydd Gwener dim ond o 9am i 5pm o dan y drefn newydd.