´óÏó´«Ã½

Mae angen "gweledigaeth newydd," medd adroddiad am ddyfodol yr Eglwys yng Nghymru.

Ymhlith 50 o argymhellion, gafodd eu cyhoeddi ddydd Gwener, mae "ardaloedd gweinidogaeth" fyddai'n adlewyrchu dalgylchoedd ysgolion uwchradd a thîm o glerigwyr a lleygwyr yn eu gwasanaethu.

Byddai'r "ardaloedd" yn lle'r plwyfi.

Argymhelliad arall yw defnydd creadigol o adeiladau eglwys fel y gall yr holl gymuned eu defnyddio, a hyfforddi lleygwyr i chwarae rhan fwy allwedol wrth arwain yr eglwys.

Comisiynodd yr Eglwys yng Nghymru yr adolygiad flwyddyn yn ôl i drafod rhai o'i heriau ac i sicrhau ei bod yn addas i'r diben cyn ei chanmlwyddiant yn 2020.

Ymhlith argymhellion eraill mae buddsoddi mwy mewn gweinidogaeth ar gyfer pobl ifanc, datblygu dulliau newydd o addoli i gyrraedd y rhai sy'n anghyfarwydd gyda gwasanaethau eglwys ac annog cyfraniadau ariannol i'r eglwys drwy ddegymu.

³Ò°ùŵ±è adolygu

Dywedodd Archesgob Cymru, Dr Barry Morgan, fod dyled yr eglwys i'r grŵp adolygu'n "enfawr".

"Mae'r grŵp wedi deall llawer iawn o wybodaeth amdanon ni fel eglwys mewn cyfnod byr ac wedi gwneud sylwadau ac argymhellion craff a threiddgar iawn.

"Rwyf hefyd yn ddiolchgar i aelodau'r Eglwys yng Nghymru, y bu nifer fawr ohonyn nhw'n ymwneud yn frwdfrydig â'r broses.

"Bydd rhaid i ni fel eglwys roi ystyriaeth ddifrifol i'r adroddiad hwn a'i argymhellion o'r plwyf i fyny i'r dalaith a phenderfynu ble i fynd oddi yma."

Dywedodd cadeirydd y grŵp, Yr Arglwydd Harries: "Canfu'r tîm adolygu fod yr Eglwys yng Nghymru yn gynnes a chroesawgar a bod llawer o bethau da'n digwydd.

"Ond er mwyn gwasanaethu pobl Cymru'n effeithlon, yn arbennig ei phobl ifanc, credwn fod angen peth ail-feddwl pellgyrhaeddol."

Bydd yr adroddiad yn cael ei gyflwyno i Gorff Llywodraethu yr Eglwys er mwyn ei ystyried.

Aelodau'r grŵp adolygu oedd: Yr Arglwydd Richard Harries o Bentregarth, cyn Esgob Rhydychen (cadeirydd, Yr Athro Charles Handy, cyn athro yn Ysgol Fusnes Llundain, yr Athro Patricia Peattie, cadeirydd cyntaf Ymddiriedolaeth Gwasanaeth Iechyd Ysbytai Prifysgol Lothian a chyn Gadeirydd Pwyllgor Sefydlog Eglwys Episcopaidd Yr Alban.