´óÏó´«Ã½

Ar ôl dyfarnu gêm fwya'i yrfa hyd yma, gêm rhwng dau dîm pentre fydd her nesaf Nigel Owens.

Roedd miliynau'n ei wylio'n cadw trefn ar y Crysau Duon ac Awstralia yn rownd derfynol Cwpan Rygbi'r Byd ddydd Sadwrn.

Ond wythnos yn ddiweddarach, bydd Owens, 44 oed, yn dyfarnu yn Nhre-gŵyr ger Abertawe, lle mae disgwyl torf o ryw 150.

Dywedodd ei bennaeth, Nigel Whitehouse: " Fe gafodd (Nigel) gwpan y byd gwych, a fe oedd dewis y bobl i fod yn gyfrifol am y rownd derfynol

"Ond bydd yn dyfarnu dau dim pentref y penwythnos nesa - a bydd yn dda iddo gael gwneud gêm leol."

Yn llygaid llawer, Nigel Owens yw dyfarnwr rygbi gorau'r byd.

Fe oedd y dyfarnwr cynta' i godi carden felen ar chwaraewr yn rownd derfynol Cwpan y Byd, gêm a enillodd Seland Newydd o 34 i 17.

Ac fe roddodd bryd o dafod i seren y gêm, Dan Carter am ddefnyddio iaith anweddus: "Paid a rhegi, ti ar y teledu!"

Dechreuodd Owens trwy ddyfarnu gemau lleol yng Nghymru a bydd yn dychwelyd i'r canol yn y gêm rhwng Tre-gŵyr a Chrymych.

Yn ôl Mr Whitehouse, mae e'n edrych ymlaen yn fawr at y gem.

"Mae'n dda bod y chwaraewyr yn gwybod bod dyfarnwr wnaeth ei swydd mor dda yng Nghwpan y Byd yn cadw trefn arnyn nhw."

"Mae'n wych i'r gamp ar lawr gwlad, a bydd yn rhoi cyfle i Nigel gael ei wynt ato trwy ddyfarnu gêm yn agos i gartref."

Ond bydd yn ôl ar y lefel ucha'r wythnos ganlynol gyda gêm rhwng Toulon a Chaerfaddon.