´óÏó´«Ã½

Mae'r stiwdios ffilm sy'n gyfrifol am ffilmiau James Bond yn ystyried gwerthu rhannau o'r cwmni, gan gynnwys eu stiwdios yng Nghymru.

Mae Pinewood Group Plc wedi penodi'r banc buddsoddi, Rothschild, i gynnal adolygiad strategol mawr o'i strwythur a'i asedau.

Mae'r gwaith ffilmio ar gyfer drama wreiddiol gyntaf Amazon Prime yn y DU, The Collection, yn dechrau ar y safle yng Nghaerdydd yn fuan.

Dywedodd Pinewood mai un o nifer o opsiynau sy'n cael eu hystyried ydi gwerthu.

Mae'r adolygiad yn rhan o ymdrechion Pinewood i gael ei restru fel un o gwmnïau mwyaf adnabyddus y DU ar Gyfnewidfa Stoc Llundain, er mwyn denu mwy o sylw gan fuddsoddwyr posibl.

Dywedodd Andrew Smith, Cyfarwyddwr Materion Corfforaethol Pinewood: "Rydym wedi cychwyn adolygiad strategol, oherwydd dim ond tri cyfranddalwr sy'n berchen ar tua 80% o'r cwmni, ac er mwyn parhau i adeiladu ar ein llwyddiannau hyd yma, mae angen i ni ryddhau mwy o gyllid fel y gallwn farchnata ar Gyfnewidfa Stoc Llundain.

Mae canolfan Pinewood Studios yng Nghymru, wedi'i lleoli yn hen adeilad y ganolfan ynni yng Ngwynllŵg.

Dywedodd Ivan Dunleavy, prif weithredwr Pinewood Group Plc: "Rydym yn credu fod gan Pinewood y potensial i adeiladu ar berfformiad cryf y blynyddoedd diwethaf, er mwyn tyfu ymhellach yn y DU ac yn rhyngwladol."