´óÏó´«Ã½

Lluniwyd y cynllun manwl yma o Gylch yr Orsedd ar droad yr ugeinfed ganrif. Mae 12 maen yn ffurfio siâp cylch. Y garreg fawr wastad yng nghanol y cylch yw'r Maen Llog, a dyma lwyfan yr Archdderwydd yn ystod y seremonïau urddo.

Yr Archdderwydd yw Pennaeth yr Orsedd. Mae’n cael ei ethol gan yr Orsedd am gyfnod o dair blynedd. Dim ond Prifeirdd a Phrif Lenorion all ddal swydd archdderwydd. Mae'n gyfrifol am arwain seremonïau'r Orsedd gan gynnwys seremonïau'r Coroni, y Fedal Ryddiaith a'r Cadeirio.

Enillwyr prif wobrau’r Eisteddfod sy’n gwisgo’r wisg wen. Gallwch adnabod enillwyr y Gadair neu’r Goron gan eu bod yn gwisgo llawryf am eu penwisg.

Mae’r aelodau sy’n gwisgo gwyrdd yn arbenigo ym myd y celfyddydau. Gall hynny ddigwydd er anrhydedd, trwy radd neu drwy arholiad. Mae enillwyr cadair a choron Eisteddfod yr Urdd hefyd yn gwisgo’r wisg werdd.

Mae’r wisg las ar gyfer rhai sydd wedi rhoi gwasanaeth arbennig i’w bro neu i’r genedl a thrwy anrhydedd ym myd y Gyfraith, Gwyddoniaeth, Chwaraeon, Newyddiaduraeth neu’r Cyfryngau.

Tusw o flodau'r maes sy’n symbol o dir a phridd Cymru yw’r Flodeuged. Mae merch ifanc o fro'r Eisteddfod yn ei chyflwyno i'r Archdderwydd fel symbol o ddymuniad ieuenctid Cymru i gynnig blagur eu doniau i'r Eisteddfod.

Dyma un o ddefodau mwyaf poblogaidd y Brifwyl. Mae’r ddawns yn cyfleu casglu blodau’r maes ac yn cael ei pherfformio gan ferched ysgol lleol. Cyfunir y ddawns gyda chyflwyniad y Flodeuged wrth i ddwy o'r dawnswyr ychwanegu'u blodau nhw at y tusw.

Mae seiniau'r ddau Gorn Gwlad yn rhan bwysig o ddefodaeth yr Orsedd ers yr 1860au. Gallwch glywed y ffanffer cyfarwydd pan mae enillwyr prif wobrau’r Eisteddfod yn cael eu galw i’r llwyfan.

Yn ei chlogyn coch hardd a phenwisg o lês aur, un o famau bro’r Eisteddfod sy'n cyflwyno’r Corn Hirlas i’r Archdderwydd fel symbol o'r gwin a estynnir i groesawu'r Orsedd.

Mae’r cleddyf yn cael ei ddefnyddio i agor a chau'r Orsedd ac yn ystod seremonïau'r Eisteddfod. Ceidwad y Cledd sy’n gofalu ar ôl y Cleddyf. Gan ei fod yn gleddyf heddwch, nid yw byth yn cael ei ddadweinio’n llwyr. Sylwch hefyd mai wrth y llafn y caiff ei ddal yn hytrach na’r carn.