´óÏó´«Ã½

Mae'r ddarlledwraig Alex Jones wedi bod yn sôn am ei dymuniad a'i gobaith y bydd ei phlentyn yn siarad Cymraeg, ond yn derbyn y bydd hynny'n her tra ei bod hi'n byw a gweithio yn Llundain.

Mae ei mab Ted, yn ymweld â Chymru ddwywaith y mis i weld ei dad-cu a'i fam-gu yn Sir Gaerfyrddin a dywedodd Alex, sy'n cyflwyno The One Show, ei bod yn gobeithio y bydd yn cael ei fagu'n ddwyieithog.

Fe fydd Ted a'i fam yn dychwelyd i Gymru ar gyfer rhifyn arbennig o The One Show fydd yn cael ei gyflwyno o Gaerdydd ddydd Gwener, ar drothwy ffeinal Cynghrair y Pencampwyr.

"Bydd gweithio yng Nghaerdydd yn hyfryd - fe fydd yna gymaint o egni yn y ddinas," meddai.

"Dyna un o'r pethau gorau am Gaerdydd - pan rydym yn croesawu digwyddiadau fel hyn mae'r ddinas yn dod yn fyw."

Cafodd Alex ei geni yn Rhydaman ond fe fuodd yn byw yng Nghaerdydd am gyfnod. Dywedodd bod y ddinas yn dal i deimlo fel cartrefi iddi, a'i bod yn colli'r lle.

Ychwanegodd ei bod yn awyddus i'w mab siarad Cymraeg, a'i bod wedi siarad am y peth gyda'i gŵr Charlie Thomson, sy'n wreiddiol o Seland Newydd.

"Mae'n anodd yn Llundain ond byddaf i'n bendant yn siarad Cymraeg ag e', ac mae Charlie yn gwybod ambell i air," meddai.

"Mae yna ysgol gynradd Gymraeg yn Llundain a byddwn wrth fy modd o'i weld yn mynd yno.

"Mae'n rhan o fy etifeddiaeth ac mae yn rhan fawr o'r hyn ydw i.

"Mae'n o'n beth mawr i mi i Ted allu cael yr un profiad - fe wnes i elwa o fod yn ddwyieithog."

Fe fydd The One Show yn fyw o Gaerdydd ar ´óÏó´«Ã½ One am 19:00 nos Wener.