´óÏó´«Ã½

"Mae'n bwysig fod pawb yn medru defnyddio diffibrilwyr," dyna fydd neges arbenigwyr iechyd ar gopa'r Wyddfa ddydd Iau.

Hefyd yn bresennol bydd nifer o gleifion sydd wedi dioddef o ataliad y galon ac a gafodd eu hachub gan ddiffibrilwyr.

Yn ddiweddar mae diffibriliwr wedi cael ei osod yng nghaffi Hafod Eryri ar gopa'r Wyddfa a'r hyn sy'n bwysig, meddai Tomos Hughes o 'Achub Calon y Dyffryn' yw "fod pawb ar draws Cymru yn gwybod sut mae ei ddefnyddio a ddim yn ofni chwaith".

"Am bob munud nad yw'r claf yn cael triniaeth mae ei gyflwr yn gwaethygu 10%," dywedodd Tomos, "ac felly mae'n holl bwysig bod diffibriliwr ar gael ymhobman ac hefyd pobl sy'n fodlon ei ddefnyddio."

Mae ffigurau y DU yn dangos mai dim ond 8.6% o gleifion sy'n goroesi ataliad y galon. Yng Nghymru mae'r nifer cyn ised â 3%.

Grŵp gwirfoddol yw 'Achub Calon y Dyffryn' a'r nod ar y dechrau oedd gosod diffibrilwyr mewn cymunedau yn Nyffryn Conwy ac Uwchaled, ond maen nhw bellach wedi ymestyn i siroedd eraill ac wedi gosod dros gant o'r teclynnau ar hyd a lled Cymru.

"Ry'n erbyn hyn wedi cyrraedd ardaloedd Llandeilo a Llanidloes ac ry'n yn annog unrhyw un i gysylltu â ni os am gael diffibriliwr - wir i chi mi all y teclynnau bach 'ma achub bywyd.

"Ry'n ni'n gneud yn siŵr bod y diffibrilwyr o'r safon a ddefnyddir mewn ambiwlans - ac ry'n wedi bod yn ffodus iawn o dderbyn arian gan gymwynaswyr.

"Bydd e'n grêt gweld cleifion y mae diffibrilwyr wedi achub eu bywydau - i ddweud y gwir nhw eu hunain sydd wedi dod atom i ddiolch i ni."

Yn gwmni i Tomos ar Yr Wyddfa fe fydd dwy nyrs - Julie Starling o Ysbyty Glan Clwyd ac Emma Williams o Ysbyty Gwynedd - mae'r ddwy wedi codi miloedd o bunnau i sicrhau bod digon o ddiffibrilwyr ar draws y Gogledd.

"Mae gwybod sut mae rhoi triniaeth CPR a gwybod pa mor hawdd ac allweddol yw hynny yn hynod bwysig," ychwanegodd Tomos Hughes.