´óÏó´«Ã½

Byddai defnyddio'r un system i ethol arweinydd nesaf Llafur Cymru a welodd Jeremy Corbyn yn cael ei ddewis yn arweinydd Llafur yn gamgymeriad, yn ôl un o gefnogwyr Mr Corbyn yng Nghymru.

Dywedodd Mick Antoniw y byddai cadw'r system bresennol yn cadw cysylltiad y blaid gyda'r undebau llafur.

Cafodd Jeremy Corbyn ei ethol drwy ddefnyddio sustem Un Aelod, Un Bleidlais (OMOV), ond yng Nghymru mae'r coleg etholiadol yn cael ei ddefnyddio, gyda thri grŵp - aelodau etholedig, undebau llafur ac aelodau cyffredin - yn cael yr un pwysau yn yr etholiad.

Nid yw Carwyn Jones wedi dweud pryd y bydd yn rhoi'r gorau i fod yn arweinydd, ond mae Llafur Cymru wedi bod yn ymgynghori ynglŷn â newid y rheolau neu beidio.

Er gwaetha' awgrym y byddai mabwysiadu system OMOV yn help i sicrhau bod cefnogwr Corbyn yn dod yn brif weinidog, dywedodd Mick Antoniw - Cwnsler Cyffredinol Cymru - y byddai newid yn gwanhau'r blaid.

Mewn erthygl bersonol ar wefan Labour List, dywedodd Mr Antoniw: "Mae bygwth dod â'r coleg etholiadol i ben er mwyn dewis arweinydd a'i ddirprwy yn gallu gwanhau a thanseilio ein cyfeillgarwch hanesyddol gyda'r undebau llafur.

"Mae'n ddealladwy bod temtasiwn i'r chwith o fewn Llafur i alw am fabwysiadu'r newidiadau i reolau Llafur Cymru gan gredu y byddai'n arwain at ganlyniad tebyg yma.

"Rwy'n anghytuno. Byddai dileu'r coleg etholiadol a lleihau ein cysylltiad cryf gyda'r undebau, er mwyn y potensial o elw tymor byr, yn tanseilio cryfder Llafur Cymru a'i allu i gynrychioli pobl a chymunedau Cymru.

"Yn fy marn i byddai gosod newid Seisnig, Llundeinig ar Gymru yn gwanhau cryfder Llafur yng Nghymru."

Ymatebodd Darren Williams, sy'n ysgrifennydd mudiad Gwreiddiau Llafur Cymru (sy'n gefnogol i Jeremy Corbyn): "Rwy'n synnu ac wedi fy siomi os yw e (Mr Antoniw) yn cefnogi coleg etholiadol yn hytrach nag OMOV.

"Rwy'n parchu Mick ac mae gen i ffydd lwyr yn ei ddidwylledd, ond mae rhai o'r bobl sy'n cefnogi'r coleg etholiadol yn gwneud hynny am eu bod yn ei weld fel y ffordd orau o rwystro ymgeisydd sydd yn gefnogol i Corbyn."

Dywedodd llefarydd ar ran Llafur Cymru y byddai pwyllgor gwaith y blaid yn ystyried yr ymatebion i'r ymgynghoriad ar newidiadau posib i reolau'r blaid yng Nghymru y tro nesaf y bydd yn cwrdd.