´óÏó´«Ã½

Mae cyngor Prifysgol Aberystwyth wedi cytuno ar gynllun £12m i ailagor neuadd breswyl Pantycelyn.

Fe fydd y neuadd ar ei newydd wedd yn cynnwys 200 o ystafelloedd gwely en-suite a llefydd i gymdeithasu.

Cafodd yr hen neuadd - fu'n darparu llety i fyfyrwyr sy'n siarad Cymraeg - ei chau yn 2015 er gwaethaf gwrthwynebiad rhai myfyrwyr.

Dywedodd llywydd Undeb Myfyrwyr Cymraeg Aberystwyth (UMCA) ddydd Llun ei fod yn "falch iawn" o'r buddsoddiad newydd.

Mae'r pecyn arian yn cynnwys £5m sydd wedi cael ei glustnodi o raglen Addysg ac Ysgolion yr 21ain Ganrif Llywodraeth Cymru.

Cafodd y cynlluniau ar gyfer y neuadd newydd eu cyflwyno yn gynharach eleni a'r bwriad yw agor y neuadd ym Medi 2019.

Yn ôl llywydd UMCA, Gwion Llwyd, mae'r undeb wedi bod "yn galw am fuddsoddiad er mwyn adnewyddu Pantycelyn" a'u bod yn "falch iawn o'r penderfyniad a wnaed gan y Cyngor".

"Edrychwn ymlaen at weithio gyda'r Brifysgol i sicrhau cyfleusterau o'r radd flaenaf ym Mhantycelyn ac i ddatblygu ymhellach y ddarpariaeth cyfrwng Cymraeg ar gyfer myfyrwyr Aber," meddai.

Yn ôl Gwerfyl Pierce Jones, dirprwy ganghellor y brifysgol a chadeirydd y bwrdd sy'n gyfrifol am yr ailddatblygu, mae'r cyhoeddiad "o'r pwys mwyaf" a bydd "adeiladwyr ar y safle yn y dyfodol agos".

Ychwanegodd: "Bydd y Bwrdd Prosiect yn parhau i oruchwylio'r camau nesaf ar ran y Brifysgol a byddwn yn gwneud popeth posibl i sicrhau fod Pantycelyn yn ailagor yn unol â'r amserlen ac y bydd y gwaith gorffenedig o'r safon orau."

Dywedodd Canghellor Prifysgol Aberystwyth, Syr Emyr Jones Parry, bod y penderfyniad "yn adlewyrchu ymrwymiad y Brifysgol i'r iaith a'r diwylliant Cymraeg".