´óÏó´«Ã½

Mae'r gweinidog gofal cymdeithasol, Huw Irranca-Davies yn dweud ei fod wedi cael "anogaeth frwd" i redeg am arweinyddiaeth Llafur Cymru.

Dywedodd AC Ogwr wrth raglen ´óÏó´«Ã½ Wales Live ei fod yn "ystyried" sefyll.

Hyd yn hyn dim ond un ymgeisydd sydd wedi cyhoeddi eu bod eisiau olynu'r Prif Weinidog Carwyn Jones - yr Ysgrifennydd Cyllid, Mark Drakeford.

Fis diwethaf fe gyhoeddodd Mr Jones ei fod yn bwriadu camu o'r neilltu yn yr hydref.

Mae angen i ymgeiswyr gael cefnogaeth pump AC Llafur arall er mwyn bod ar y papur pleidleisio.

"Dwi heb wneud penderfyniad eto," meddai Mr Irranca-Davies, gafodd ei ethol i'r Cynulliad yn 2016.

"Dwi wedi cael anogaeth frwd i sefyll. Dwi'n ystyried y peth. Dwi ddim wedi gwneud penderfyniad eto, ond mae'n ras hir.

"Fe allai hyn fod fel y sgwarnog a'r crwban. Dwi'n enwog am fod yn araf i ddod i benderfyniadau fel hyn.

"Mae fy nheulu'n bwysig, mae fy nghydweithwyr yma yn y Cynulliad yn bwysig, fy mhlaid yn yr etholaeth hefyd.

"Fe wnâi ddod ati ymhen amser pan dwi wedi cael y trafodaethau yna i gyd.

"Ond rhaid i mi ddweud 'mod i wedi fy annog gan y negeseuon o gefnogaeth ac anogaeth dwi wedi'u cael i sefyll, ond fe wnâi aros i weld."

Dyw ymgeiswyr posib eraill ar gyfer yr arweinyddiaeth, gan gynnwys Eluned Morgan, Ken Skates, Vaughan Gething a Jeremy Miles, heb gyhoeddi eu bwriad i sefyll eto ai peidio.

Bydd Wales Live yn cael ei darlledu am 22:30 ar ´óÏó´«Ã½ One Wales.