´óÏó´«Ã½

Mae Betsan Powys wedi cyhoeddi ei bod yn gadael ei rôl fel golygydd Radio Cymru.

Bu'n arwain yr orsaf ers pum mlynedd, gan oruchwylio cyfnod o newid mawr.

Cyn cymryd yr awenau gyda'r orsaf bu'n gyflwynydd Newyddion ar S4C i'r ´óÏó´«Ã½, gan hefyd weithio ar ystod eang o raglenni newyddion i'r gorfforaeth fel Panorama a Week In Week Out.

Ar ôl cyfnod gyda ITV Cymru dychwelodd i'r ´óÏó´«Ã½ gan ennill Newyddiadurwr Cymreig y Flwyddyn.

Bu hefyd yn gyfrifol am gynnyrch newyddion gwleidyddol ´óÏó´«Ã½ Cymru o 2006.

Dywed Betsan Powys: "Dwi wedi mwynhau bob her, ar ac oddi ar y sgrin, bob trafodaeth greadigol, bob cyfle fel newyddiadurwraig yma'n ´óÏó´«Ã½ Cymru ar hyd y blynyddoedd a chyda criw Y Byd ar Bedwar yn HTV Cymru.

"Bob cyfle i gynnig y rhaglenni a'r lleisiau gorau posib i wrandawyr Radio Cymru - a nawr mae hi'n bryd mwynhau cyfnod yr un mor hapus a gwerthfawr yng nghwmni'r teulu. "

Pan gafodd ei phenodi yn 2013 dywedodd Ms Powys y byddai'n "gwrando gyda diddordeb ar 'Y Sgwrs' ac rwy'n gyffrous iawn am fy mod nawr yn cael y cyfle i arwain y gwasanaeth i ddyfodol newydd".

Cafodd 'Y Sgwrs' ei chynnal yn y cyfnod o gwmpas Eisteddfod 2013 pan oedd cyfle i wrandawyr Radio Cymru fynegi barn am gynnwys yr orsaf.

O ganlyniad i'r sgwrs, fe gafodd nifer o newidiadau eu gwneud i arlwy'r orsaf.

Ers dod yn olygydd hefyd, bu'n gyfrifol am sefydlu gorsaf ddigidol Radio Cymru 2 yn dilyn cyfnod o arbrofi gyda Radio Cymru Mwy.

Yn dilyn cyhoeddiad Betsan Powys, dywedodd Cyfarwyddwr ´óÏó´«Ã½ Cymru, Rhodri Talfan Davies: "Mae cyfraniad Betsan i ´óÏó´«Ã½ Cymru wedi bod yn rhyfeddol.

"Un o newyddiadurwyr gorau ei chenhedlaeth, mae ei gyrfa gyda'r adran newyddion a materion cyfoes wedi ei gweld ar raglenni megis Newyddion, Panorama, Week In Week Out, nifer fawr o raglenni Etholiadol arbennig yn ogystal â chwe blynedd nodedig fel Golygydd Gwleidyddol ´óÏó´«Ã½ Cymru.

"Mae Radio Cymru wedi ffynnu o dan ei harweinyddiaeth sicr a chreadigol.

"Mae'n gyfnod o ffigyrau gwrando cryf a chadarn, a'r gynulleidfa'n gwrando ar fwy o raglenni nac ers blynyddoedd ac eleni gwelwyd creu ail orsaf - Radio Cymru 2.

"Mewn gwirionedd, mae'n ddatblygiad sy'n ddyledus i ymrwymiad taer Betsan i sicrhau'r gwasanaeth gorau posib ar gyfer y cynulleidfaoedd mae hi'n eu gwasanaethu a'u caru."

Fe fydd Betsan Powys yn gadael yn yr hydref.