´óÏó´«Ã½

Mae cytundeb rhwng cwmni dur Tata a chwmni o'r Almaen, Thyssenkrupp i uno yn agos at greu'r ail wneuthurwr dur mwyaf yn Ewrop, ar ôl Arcelor Mittal.

Mae ffynonellau'n dweud gallai cytundeb - sydd wedi bod yn cael ei drafod ers dros flwyddyn - gael ei gwblhau yn y dyddiau nesaf.

Byddai'n gweld safleoedd Tata yn y DU yn uno gyda Thyssenkrupp sydd â gwerthiant blynyddol o £13bn.

Bydd y safleoedd yn cynnwys y gwaith dur ym Mhort Talbot.

Mae trafodaethau wedi eu harafu gan gynllun pensiwn gweithwyr Tata.

Dri mis yn ôl, fe wnaeth y rheoleiddiwr pensiynau roi sêl bendith ar greu cronfa bensiwn newydd wedi i Tata gytuno i dalu £550m a rhoi cyfran ecwiti o 33% yn Tata Steel UK i'r gronfa.

Yn ddiweddar mae Thyssenkrupp wedi wynebu pwysau gan gyfranddalwyr er mwyn sicrhau telerau gwell gan Tata.

Mae Tata a Thyssenkrupp eisoes wedi ymrwymo i'r safle ym Mhort Talbot, sef y safle dur mwyaf yn y DU.

Ond mae arbenigwyr yn y diwydiant dur wedi dweud fod amheuaeth yn parhau ynglŷn â dyfodol y safle.