´óÏó´«Ã½

Mae banc HSBC wedi ymddiheuro ar ôl gwrthod delio gydag ymholiad cwsmer oedd wedi anfon neges yn y Gymraeg.

Roedd y canwr Geraint Løvgreen wedi cysylltu gyda'r banc drwy'r gwasanaeth ar-lein yn ddiweddar i roi gwybod am newid cyfeiriad, gan gofyn i unrhyw ohebiaeth i fynd i'r cyfeiriad newydd.

Ond fe ddywedodd HSBC eu bod nhw ddim yn gallu darllen y neges am ei fod mewn "iaith dramor", gan ofyn i Mr Løvgreen anfon y neges eto yn Saesneg.

Mae Comisiynydd y Gymraeg wedi cysylltu â'r banc i drafod y mater.

"Maen nhw'n cyfrif y Gymraeg fel iaith estron ac mae hynny'n fy ngwylltio fi," meddai Mr Løvgreen.

"Mae HSBC yn ymfalchïo mai nhw ydy'r banc lleol felly mae'n fater o hyfforddiant i staff."

Mewn llythyr i HSBC, dywedodd Mr Løvgreen ei bod hi'n "warthus" bod y Gymraeg yn cael ei galw'n "foreign language" ac yn "adlewyrchu'n wael iawn ar yr hyfforddiant yr ydych yn ei roi i'ch staff".

Mewn ymateb, fe ddywedodd llefarydd ar ran HSBC: "Rydym yn gweithio'n galed i roi gwasanaethau Cymraeg i'n cwsmeriaid ac yn gweithio'n agos gyda Chomisiynydd y Gymraeg.

"Yn anffodus, yn yr achos hwn ni chafodd y neges gan y cwsmer ei adnabod fel un Cymraeg ac o ganlyniad ni wnaeth ein tîm o siaradwyr Cymraeg ddelio gyda'r mater, ac rydym yn ymddiheuro am hynny."

Ychwanegodd y llefarydd y byddan nhw'n ceisio atal hyn rhag digwydd eto.

Dywedodd Meri Huws, Comisiynydd y Gymraeg, ei bod wedi cynnal adolygiad yn 2015 o wasanaethau Cymraeg banciau yng Nghymru.

"Yn wahanol i sefydliadau sector cyhoeddus nid oes dyletswyddau cyfreithiol ar fanciau i ddarparu gwasanaethau yn Gymraeg.

"Un o argymhellion yr adolygiad oedd sefydlu fforwm ar gyfer uwch reolwyr banciau sy'n gweithredu yng Nghymru i rannu arferion da ac i drafod ffyrdd o gynyddu eu defnydd o'r iaith.

"Mae'r fforwm wedi arwain at nifer o gamau cadarnhaol gan rai banciau o ran cynyddu eu defnydd o'r Gymraeg. Mae gan eraill ffordd bell i fynd."

Ychwanegodd ei bod wedi cysylltu â HSBC ynghylch cwyn Mr Løvgreen yn gofyn am ymateb.