´óÏó´«Ã½

Mae trigolion Gwlad y Rwla, cymeriadau hoffus Angharad Tomos, yn gyfarwydd i nifer o ddarllenwyr, a Rala Rwdins, y wrach glên, wedi bod yn boblogaidd ymysg plant Cymru ers ei hymddangosiad cyntaf ddechrau'r 1980au.

Ond mae'r arlunydd o Aberystwyth, Efa Lois, wedi penderfynu rhoi tro modern i'r ffrindiau hudol, ac ailddychmygu sut y bydden nhw'n edrych yn yr 21ain ganrif. Yma mae hi'n egluro pam:

"Fy mwriad oedd i greu rhywbeth fydde'n portreadu'r cymeriadau mewn ffordd cyfoes, yn fy arddull i, fel sialens i fy hunan yn fwy nag unrhyw beth."

"Roedd cymeriadau Gwlad y Rwla yn rhan o dirlun fy mhlentyndod, ac roedd creu y darnau hyn yn ffordd o ddod â nhw i fy mhresennol i, fel petai."

"Mae'r cymeriadau arluniais i yn edrych yn wahanol i'r rhai gwreiddiol - mae un yn darllen dail te, mae gan un datŵs ac mae un arall yn darllen pêl grisial."

"Mi osodais i'r cymeriadau ble dwi'n eu dychymygu nhw'n bod - y Dewin Dwl yn myfyrio mewn cae o fadarch, a Rala Rwdins yn eistedd mewn dŵr, wedi ei hamgylchynu â blodau."

"Dwi'n cael fy ysbrydoli gan hen chwedlau a thraddodiadau sy'n dod fel ail-natur i ni yng Nghymru, a sut fydde cyflwyno'r pethau hynny ar ffurf gyfoes i'r byd tu hwnt."

"Dwi'n arlunio menywod anghofiedig hanes Cymru ar gyfer Prosiect Drudwen a darluniau o leoliadau Cymru ar gyfer Rhithganfyddiad. Dwi hefyd yn arlunio seintiau anghyffredin Cymru ar fy nghyfrifon Twitter ac Instagram."

"Dwi'n credu bod cyflwyno Cymru a'r hyn sy'n ein gwneud ni'n unigryw i weddill y byd yn hynod bwysig."

Hefyd o ddiddordeb: