´óÏó´«Ã½

Dywed grŵp o is-bostfeistri eu bod wedi ennill buddugoliaeth gyfreithiol bwysig yn erbyn Swyddfa'r Post.

Mae dros 550 o is-bostfeistri neu gyn is-bostfeistri yn dwyn achos yn erbyn Swyddfa'r Post a'u system Gwybodaeth Technoleg Horizon rhwng 1999 a 2000.

Maen nhw'n dweud mai camgymeriadau'r system gyfrifiadurol achosodd i symiau o arian ddiflannu.

Yn ôl y grŵp o is-bostfeistri, mae'r barnwr wedi gwneud nifer o benderfyniadau sy'n ffafrio eu hachos.

Mewn gwrandawiad ddydd Gwener roedd Mr Ustus Fraser yn penderfynu ar nifer o faterion yn ymwneud â'r berthynas rhwng yr is-bostfeistri a Swyddfa'r Post.

Dywedodd y barnwr fod y cytundeb rhwng yr is-bostfeistri â Swyddfa'r Bost yn un lle'r oedd yna berthynas - sy'n golygu na allai Swyddfa'r Post ymddwyn mewn "modd fyddai'n cael ei ystyried yn fasnachol annerbyniol gan bobl onest a synhwyrol".

Mae Swyddfa'r Post yn mynnu fod ganddyn nhw ffydd i'r eithaf yn eu systemau.

Maen nhw'n dadlau fod yn rhaid i'r is-bostfeistri brofi fod unrhyw gamgymeriadau ar eu rhan wedi deillio oherwydd nam gyda Horizon.

Un o'r cyn-bostfeistri sy'n rhan o'r achos yw Noel Thomas.

Fe gafodd Mr Thomas, oedd yn cadw Swyddfa'r Post yng Ngaerwen, ei garcharu am naw mis yn 2006, ar ôl cyfadde' bwlch o £48,000 yn y cyfrifon.

Dywedodd wrth y ´óÏó´«Ã½ ei fod am i "bawb allu cael clirio eu henwau".

Ychwanegodd: "Dwi'n falch, ond tydi hon ond y step gyntaf ar yr ystol, mae'r nesaf yn mynd i fod yn fwy pwysig ac yn fwy technegol."

Fe fydd gwrandawiadau cyfreithiol pellach yn cael eu cynnal ynglŷn â materion eraill cysylltiedig â'r achos - gan gynnwys ystyriaeth a wnaeth Swyddfa'r Post dorri unrhyw reolau o ran eu cytundeb gyda'r is-bostfeistri.