´óÏó´«Ã½

Fe fydd swyddogion iechyd a diogelwch Ceredigion yn rhoi sylw penodol i ddiogelwch cerddwr yn croesi'r ffordd fawr wrth iddynt ystyried trefniadau ar gyfer yr Eisteddfod Genedlaethol yn Nhregaron yn 2020.

Clywodd cynghorwyr y bydd angen gofal i ddiogelu'r cyhoedd yn wyneb "marwolaeth drasig" ddigwyddodd yn ystod y Sioe Frenhinol yn Llanelwedd yn 2017.

Fe wnaeth y Sioe Frenhinol gyflwyno trefniadau diogelwch newydd y llynedd yn dilyn marwolaeth James Corfield.

Dywedodd Gareth Rees, prif swyddog trwyddedu Ceredigion, fod ei swyddogion eisoes wedi bod yn trafod trefniadau diogelwch ar gyfer yr Eisteddfod Genedlaethol.

"Mae'r achlysur yn un pwysig i'r ardal, yn ddiwylliannol ac yn economaidd," meddai.

"Mae'r grŵp wedi trafod anghenion trwyddedu ar y safle, materion yn ymwneud a llety, iechyd a diogelwch, rheolaeth traffig, diogelwch tân, asesiadau risg, rheolaeth sŵn a darpariaeth cymorth cyntaf a dŵr."

Ychwanegodd fod angen ystyriaeth fanwl i ddiogelwch pobl sy'n croesi'r ffordd fawr er mwyn mynd i feysydd parcio a'r maes gwersylla.

Dywedodd y Cynghorydd Mark Strong wrth aelodau'r Pwyllgor Trwyddedu y dylid ystyried y posibilrwydd o godi pont troed dros dro ger y safle.

Fe fydd aelodau'r grŵp yn ymweld â'r Eisteddodd yn Llanrwst ym mis Awst er mwyn craffu ar y trefniadau yno.

Fe wnaeth y Pwyllgor Trwyddedu hefyd drafod trefniadau ar gyfer gŵyl gerddorol newydd yn y sir.

Cafodd grŵp cynghori newydd ei sefydlu er mwyn trafod cais i gynnal Gŵyl Gwenlli ar safle ger Synod Inn ar benwythnos cyntaf mis Gorffennaf.

Dywed y trefnwyr fod yr ŵyl yn llenwi'r bwlch wrth i Ŵyl Nôl a Mlaen gymryd seibiant eleni, ac y bydd yn rhoi llwyfan i artistiaid a grwpiau Cymraeg.