´óÏó´«Ã½

Daeth profiadau cleifion mamolaeth ym Mwrdd Iechyd Cwm Taf Morgannwg fel "sioc lwyr", yn ôl uwch dîm rheoli'r bwrdd.

Mae gwasanaethau mamolaeth yn Ysbyty Brenhinol Morgannwg ac Ysbyty'r Tywysog Charles o dan fesurau arbennig yn dilyn adolygiad damniol.

Ers bore Iau, mae Pwyllgor Iechyd a Gofal Cymdeithasol y Cynulliad yn holi penaethiaid y bwrdd iechyd, yn sgil galwadau am ymddiswyddiadau.

Dywedodd y prif weithredwr, Allison Williams mai dyma'r peth anoddaf iddi ddod ar ei draws yn ystod ei gyrfa.

"Yr adroddiad i brofiadau cleifion - mae rhai o hanesion y teuluoedd yn dorcalonnus," meddai.

"Allwn ni ddim gwneud unrhyw esgusodion am hynny, roedd eu profiadau nhw'n annerbyniol ar bob math o lefelau.

"Mae'r ffaeleddau yn mynd yr holl ffordd drwy'r corff."

Daeth adolygiad gan ddau goleg brenhinol i'r casgliad fod gwasanaethau mamolaeth Cwm Taf "dan bwysau eithriadol" ac yn "gamweithredol".

Yn ôl cadeirydd y bwrdd, yr Athro Marcus Longley, roedd y penaethiaid mewn "sioc" pan glywon nhw am y canfyddiadau ar lafar ym mis Ionawr gan dîm adolygu'r colegau brenhinol.

"Mae angen adolygu sut rydym yn trin pobl sy'n codi materion gyda ni - nid ydym wedi gwneud hynny mewn unrhyw ffordd briodol," meddai'r Athro Longley.

Ychwanegodd Ms Williams: "I fod yn gwbl onest, roedd maint yr adborth gan famau yn sioc lwyr, hyd yn oed i mi."

Fe wrthododd Ms Williams - sydd wedi bod yn brif weithredwr ers 2011 - awgrym gan Helen Mary Jones AC, llefarydd iechyd Plaid Cymru, ei bod yn poeni fwy am niwed i enw da'r bwrdd iechyd.

Mae Mick Giannasi - sy'n arwain panel annibynnol i oruchwylio gwelliannau yn yr adran mamolaeth - eisoes wedi dweud na fydd yn oedi cyn awgrymu newidiadau personél os bydd angen.

Ond dywedodd yr Athro Longley y byddai hynny'n arwain at "betruster ac oedi, a dwi'n siŵr fod neb eisiau hynny".