´óÏó´«Ã½

Mae chwaraewr canol cae'r Bala, Daniel Gosset wedi datgelu ei fod yn brwydro canser.

Mewn datganiad gafodd ei ryddhau drwy'r clwb ddydd Iau, dywedodd y gŵr 24 oed ei fod wedi cael diagnosis o non-Hodgkin Lymphoma, math o ganser y gwaed.

Mae Gosset, sy'n gyn-ddisgybl Ysgol Syr Hugh Owen yng Nghaernarfon, hefyd wedi cynrychioli'r Seintiau Newydd, Dinas Bangor, Oldham Athletic a thîm lled-broffesiynol Cymru.

"Mae'r gefnogaeth dwi wedi cael gan bobl ers darganfod 'mod i'n sâl wedi bod yn anhygoel a dwi wir yn ddiolchgar i bawb sydd wedi bod mewn cysylltiad," meddai.

Diolchodd i ffisiotherapydd y clwb, Ffiona Evans, am ei annog i gael profion pellach ar ôl iddo gael poen "anarferol" yn ei goes.

"Dwi'n lwcus iawn o fod yn rhan o glwb mor arbennig ac mi fydda i'n gwneud popeth o fewn fy ngallu i fod 'nôl ar y cae ym Maes Tegid cyn gynted â phosib."