����ý

Rhybudd: Mae iaith gref yn yr erthygl hon.

Mae'r dyn sy'n goruchwylio cod ymddygiad Aelodau'r Cynulliad wedi'i gyhuddo o "safonau dwbl" gan AC Llafur.

Dywedodd AC Torfaen, Lynne Neagle bod penderfyniad y comisiynydd safonau, Syr Roderick Evans fod Leanne Wood wedi torri'r cod yn un "syfrdanol".

Roedd cyn-arweinydd Plaid Cymru wedi defnyddio gair rheg i feirniadu blogiwr ar Twitter.

Fe wnaeth Ms Neagle gyferbynnu'r penderfyniad gyda phenderfyniad i "beidio ceryddu AC gwrywaidd oedd wedi gwneud fideo sarhaus o gyd-weithiwr benywaidd".

Fe gyhoeddodd Ms Wood y neges mewn ymateb i feirniadaeth gan Royston Jones, sy'n blogio dan yr enw Jac o' the North, ynglŷn â'r AC Delyth Jewell.

Roedd Ms Jewell newydd ei dewis i olynu'r diweddar Steffan Lewis fel AC Dwyrain De Cymru, ac roedd sylw Mr Jones yn cyfeirio at ei diddordebau.

Yn ôl y pwyllgor roedd iaith Ms Wood yn ei hymateb yn "anaddas", ond mae hi'n dweud nad yw'n difaru ei defnydd o eiriau.

Dywedodd Ms Neagle: "Mae gwleidyddion benywaidd yn wynebu sarhad ar-lein pob dydd - fe wnaeth Leanne Wood ymateb mewn ffordd uniongyrchol a dynol i ymosodiad ar gyd-weithiwr benywaidd.

"Rwy'n meddwl, fel cynrychiolwyr dros ferched, ei bod yn iawn i ni sefyll gyda'n gilydd yn drawsbleidiol yn erbyn y sarhad yma.

Yn dilyn ymchwiliad Syr Roderick fe gytunodd y pwyllgor safonau gyda'i gasgliadau fod y trydar yn groes i'r cod safonau, gan argymell ceryddu Ms Wood - penderfyniad fydd angen cydsyniad y Cynulliad.

Mae Plaid Cymru wedi dweud ei fod yn cefnogi Ms Wood, ac y bydd yn gwrthwynebu'r penderfyniad.

Dywedodd llefarydd ar ran y comisiynydd safonau mai ei rôl yw "derbyn am ymchwilio i gwynion yn erbyn Aelodau'r Cynulliad, ac yna adrodd i'r Pwyllgor Safonau".

"Fe wnaeth y pwyllgor trawsbleidiol, sy'n cynnwys aelod o grŵp Plaid Cymru, ystyried adroddiad y comisiynydd a phenderfynu bod y cod wedi'i dorri," meddai.

Ym mis Medi'r llynedd fe wnaeth Syr Roderick benderfynu bod fideo gan AC UKIP, Gareth Bennett, oedd yn portreadu AC Llafur, Joyce Watson fel gweinydd ddim yn rhywiaethol.

Cafodd Mr Bennett ei wahardd o'r Senedd am wythnos yn y pendraw wedi i'r mater gael ei basio 'mlaen i unigolyn arall.

Yn y cyfamser, mae AC Llafur Caerffili, Hefin David wedi derbyn ei fod wedi torri'r cod ymddygiad wedi iddo ddefnyddio "term di-chwaeth" i gyfeirio at gynghorydd Plaid Cymru ar-lein.

Roedd wedi galw Vaughan Williams yn "goc oen" ac yn "utter knob".

Mae Dr David wedi ymddiheuro, ac fe benderfynodd y Pwyllgor Safonau bod hyn yn ddigonol.