´óÏó´«Ã½

Mae ymosodwr Cymru, Tom Lawrence wedi pledio'n euog i gyhuddiad o yrru dan ddylanwad alcohol.

Plediodd y pêl-droediwr 25 oed yn euog hefyd i gyhuddiad o fethu â stopio wedi damwain yn dilyn gwrthdrawiad ar yr A6 ger Derby ar 24 Medi.

Clywodd Llys Ynadon Derby bod prawf anadl wedi amlygu 58 meicrogram o alcohol yn ei waed i bob 100 miligram o anadl, o'i gymharu â'r lefel gyfreithiol, sef 35 meicrogram.

Plediodd ei gyd-chwaraewr yn Derby County, Mason Bennett, 23, yn euog i'r un cyhuddiadau.

Roedd gan yntau lefel o 64 miligram o alcohol yn ei gorff, yn ôl prawf anadl.

Cafodd y ddau orchymyn cymdeithasol 12 mis a gwaharddiad rhag gyrru am ddwy flynedd.

Dywedodd y Barnwr Rhanbarthol, Jonathan Taaffeehe wrth ddedfrydu bod y ddau ddiffynnydd "yn ffodus iawn i fod yma heddiw" wedi "gwrthdrawiad allai fod wedi arwain at farwolaeth".

Ychwanegodd: "Rydych chi'ch dau yn ddynion ifanc deallus a thalentog sydd wedi dwyn gwarth ar eich hunain, eich teulu, eich proffesiwn a'ch clwb."

Cafodd y ddau eu harestio yn dilyn gwrthdrawiad rhwng car Range Rover Sport a Mercedes yn ardal Allestree.

Roedden nhw wedi bod mewn digwyddiad ar gyfer holl dîm Derby pan darodd cerbyd Lawrence gefn cerbyd Bennett ychydig cyn hanner nos.

Clywodd y llys bod car Lawrence wedi mynd ar draws cylchfan cyn taro "dodrefn stryd".

Fe adawodd y ddau y safle cyn dychwelyd 45 munud yn ddiweddarach.

Dywedodd Marianne Connally ar ran yr erlyniad bod criw o barafeddygon "trwy hap yn llwyr" wedi gweld y gwrthdrawiad a rhoi cymorth i ddau deithiwr wrth i'r diffynyddion ffoi.

Dywedodd Lucy Whitaker, ar ran Bennett, ei fod yn cyfaddef yfed "rhywfaint o alcohol" ond yn gyrru'n "hollol normal" adref.

Cafodd "sioc lwyr", meddai, pan darodd car Lawrence ei gerbyd yntau ac "fe aeth i banig" wedi hynny.

Dywedodd ei fod wedi cael galwad ffôn gan Lawrence, wedi i'r ddau adael safle'r gwrthdrawiad, yn gofyn iddo ei godi o garej ac fe aethon nhw'n ôl i'r gylchfan.

Ar ran Lawrence, dywedodd Shaun Draycott bod tystlythyrau, gan gynnwys un gan reolwr Cymru, Ryan Giggs, yn amlygu "ymddygiad anghyson â chymeriad... dyn ifanc parchus".

Mae'n fater o "ofid eithriadol", meddai, bod y diffynnydd wedi gwneud rhywbeth mor ddifrifol ond fe bwysleisiodd ei fod "ddim yn osgoi ei gyfrifoldebau".

"Yn anhygoel, â bod yn blaen, fe benderfynodd yrru car gan wybod ei fod dan ddylanwad alcohol," dywedodd Mr Draycott.

"Fe achosodd ddifrod i'w gerbyd ei hun, i gerbyd rhywun arall, ac i'w enw da ei hun."

Ychwanegodd Mr Draycott bod Lawrence wedi dod yn "eithaf dibynnol" ar alcohol ers marwolaeth ei fam, gan fod y ddau mor agos.

Mae'r farwolaeth, meddai, "wedi effeithio'n fawr ar iechyd seicolegol y dyn ifanc yma".

Cafodd capten Derby, Richard Keogh, oedd yn teithio yn un o'r cerbydau, anaf i'w ben-glin a fydd yn ei atal rhag chwarae am hyd at 15 mis.

Cafodd Lawrence a Bennett eu beirniadu gan eu clwb am eu hymddygiad, a dirwy o chwech wythnos o gyflog - y swm mwyaf oedd yn bosib dan eu cytundebau gyda'r clwb.