´óÏó´«Ã½

Mae'r Undeb Ewropeaidd wedi cytuno i ohirio dyddiad ymadael y Deyrnas Unedig tan 31 Ionawr 2020, yn ôl neges ar gyfrif Twitter Llywydd Cyngor Ewrop.

Ysgrifennodd Donald Tusk y byddai gwledydd yr UE yn caniatáu dyddiad ymadael hyblyg sy'n golygu y gallai'r DU adael yr undeb cyn y dyddiad hwnnw petai'n llwyddo i gael sêl bendith Aelodau Seneddol i gytundeb Brexit.

Daw'r cyhoeddiad wrth i ASau baratoi i bleidleisio ar gynnig gan Boris Johnson i gynnal etholiad cyffredinol ar 12 Rhagfyr.

Roedd y DU i fod i adael yr UE ar 31 Hydref, ond doedd dim dewis yn gyfreithiol gan Mr Johnson ond gofyn am estyniad wedi i'r Senedd fethu â dod i gytundeb.

Mae'r SNP a'r Democratiaid Rhyddfrydol hefyd yn cynnig cynnal etholiad cyffredinol ar 9 Rhagfyr.

Mae'r ´óÏó´«Ã½ wedi gweld fersiwn drafft o'r cytundeb ar gyfer llysgenhadon 27 gwlad yr UE sydd hefyd yn cynnwys ymroddiad na ellir ail-drafod telerau'r Cytundeb Ymadael yn y dyfodol.

Dywedodd Prif Weinidog Cymru, Mark Drakeford ar ei gyfrif Twitter ei fod yn "croesawu'r penderfyniad yma", gan ddweud bod y Llywodraeth Geidwadol yn San Steffan wedi "gwastraffu amser a ffwdan dros y tair blynedd diwethaf".

Yn ôl arweinydd Plaid Cymru yn San Steffan, Liz Saville Roberts mae angen i'r gwrthbleidiau ddefnyddio'r amser ychwanegol i sicrhau Pleidlais y Bobl - neu "ffurfio llywodraeth dros dro" os oes rhaid.

Dywedodd: "Mae'n rhaid i'r rheiny ohonom sy'n gwrthwynebu achosi niwed Brexit ym mhedwar gwlad y DU uno unwaith yn rhagor i sicrhau'r ffordd fwyaf synhwyrol o ddod â'r llanast yma i ben - refferendwm gair olaf."