´óÏó´«Ã½

Cynyddu mae'r galwadau ar feysydd carafanau i gau wrth i'r pryder ddwysáu yn ne Gwynedd yn sgil achosion coronafeirws.

Mae yna bryder fod llawer o ymwelwyr o du allan i'r ardal yn teithio i hunan ynysu yn eu carafanau yn ardal Tywyn ym Meirionnydd mewn ymgais i geisio osgoi'r feirws.

Mae pryderon tebyg wedi codi yn LlÅ·n ac Eifionydd wedi i feddyg teulu lleol rybuddio fod gwasanaethau iechyd cefn gwlad dan bwysau o achos perchnogion ail gartrefi sydd yn dewis hunan ynysu yn yr ardal.

Dywedodd Gweinidog Iechyd Cymru, Vaughan Gething, fod yna ganllawiau clir i bobl beidio teithio yn ddiangen.

"Dyw mynd i'ch carafán ar y penwythnos ddim yn fy nharo i fel teithio angenrheidiol.

"Rydym yn gofyn i bobl fod yn gyfrifol.

"Rydym yn cymryd hyn o ddifri ac os oes angen gweithredu rydym yn barod i ddefnyddio ein pwerau...."

Yn y cyfamser, mae arweinydd Plaid Cymru, Adam Price, wedi ysgrifennu llythyr at y prif weinidog Mark Drakeford yn galw am weithredu ar unwaith.

"Rwy'n gofyn i chi nawr gymryd camau ar frys er mwyn osgoi pwysau ychwanegol diangen ar ein system iechyd a gofal cymdeithasol yn yr amser anodd hwn," meddai yn ei lythyr.

Un o'r bobl sy'n poeni am y sefyllfa ym Meirionydd yw Maldwyn Davies, sy'n byw yn Nhywyn.

Dywedodd: "Y prif bryder yw bod pobl yn dod o ganolbarth Lloegr i aros yn eu carafanau - ac o'r herwydd mae 'na bosibilrwydd y byddan nhw'n dod â'r feirws efo nhw."

Ychwanegodd: "Ro'n ni'n clywed bod rhywun yn siarad gyda theulu yng nghanolbarth Lloegr ac yn eu hannog i ddod yma - mae hynna'n golygu hefyd y bydd llai o stwff ar ôl ar y silffoedd.

"Yr awgrym yw y dylid cau y meysydd carafanau fel na fedr y bobl yma dyrru lawr yma."

Un maes carafanau sydd wedi cau yw maes carafanau Dolgamedd yn ymyl Dolgellau, sy'n cael ei redeg gan Bethan Gwanas a'i theulu.

Dywedodd: "Rhaid i ni fod yn foesol - mae meysydd carafanau eraill wedi cymryd y cam ac ro'dd yn rhaid i ninnau hefyd.

"Ma'n gwneud synnwyr os 'dan ni fod i osgoi teithio yn ddiangen. Roedden ni'n gallu dweud wrth ein cwsmeriaid i beidio dod - fydd ein hawdurdod iechyd ni ddim yn gallu delio gyda channoedd o bobl yn sâl ar hyd lle.

"Mae'n mynd i fod yn glec ariannol ond mae bywydau yn bwysicach na phres."

Mae anfodlonrwydd tebyg wedi ei fynegi yn Sir Benfro, yn sgil pryderon am hysbysebu eiddo ar gyfer ymwelwyr gan annog pobl i ystyried mynd yno i hunan ynysu.

Ar Twitter nos Wener, dywedodd AS Preseli Penfro, Stephen Crabb: "Rwyf wedi treulio 15 mlynedd yn annog pobl i ddod i'r ryfeddol Sir Benfro ar wyliau.

"Byddai'n parhau i wneud hynny pan rydyn ni wedi dod trwy hyn.

"Ond nawr mae angen i bobl osgoi teithio os yn bosib. Mae'r bwrdd iechyd lleol yn bryderus iawn ynghylch pwysau ychwanegol ar wasanaethau."

Ddydd Sadwrn galwodd arweinydd Cyngor Sir Ynys Môn ar dwristiaid ac ymwelwyr i gadw draw o'r ynys "hyd nes bod yr argyfwng coronafeirws drosodd."

Yn ôl y cynghorydd Llinos Medi, dylai pobl ddim teithio i'r ynys "yn ystod amser mor gythryblus, does dim dewis heblaw annog ymwelwyr a thwristiaid, gan gynnwys y rhai sy'n berchen ar ail gartrefi, i gadw draw o'r Ynys - a hynny ar unwaith.

"Mae'n rhaid i ni i gyd chwarae ein rhan, ac i beidio teithio oni bai ei fod yn hanfodol, er mwyn mynd i'r afael â'r argyfwng cenedlaethol yma."

Apeliodd hefyd ar y diwydiant twristiaeth i helpu i leihau cyswllt cymdeithasol a galwodd ar barciau carafanau a busnesau gwely a brecwast i gau er mwyn cyfyngu ar ledaeniad y clefyd.