´óÏó´«Ã½

Mae nifer sylweddol o dafarnau'n mynd i aros ar gau, ar ôl i Lywodraeth Cymru ganiatáu iddynt ailagor.

Yn ôl rhai o berchnogion busnes Aberystwyth, does "dim synnwyr ariannol" mewn ailagor.

Mae o leiaf tair o dafarnau'r ardal wedi dweud eu bod yn cau yn gyfan gwbl.

Fe ddaw wrth i berchnogion ddweud bod gwneud elw ac ymbellhau'n gymdeithasol yn amhosib.

Yn berchennog ar y Conrah, yn Ffosrhydgaled ger Aberystwyth, mae Geraint Hughes wedi penderfynu peidio ailagor eleni.

Bu'n rhaid iddo wneud penderfyniad anodd a chael gwared ar 26 o staff.

"Dwi ddim yn teimlo bo hi werth y risg i ni ailagor. Un peth pwysig ydy'r risg i iechyd lleol, ond dyw hi ddim yn gwneud synnwyr ariannol i ni agor chwaith.

"Mae 60% o'n hincwm blynyddol ni yn dod gan briodasau, ac mae'r cyfan wedi diflannu eleni. Byddai'n costio mwy i fi ailagor na aros ar gau.

"Dyw'r yswiriant ddim yn fodlon talu allan am coronafeirws chwaith, felly gall y busnes fod mewn gwaeth twll os bydde ni'n ailagor a chael achosion yma.

"Dwi ddim yn teimlo'n gyfforddus ynglŷn â chael gwared ar staff, ond dwi ddim yn gyfforddus ailagor chwaith."

Dydy'r Conrah ddim yn achos unigol o fusnes yn penderfynu aros ar gau.

Mewn datganiad ar eu tudalen Facebook, mae Tafarn Y Gors yn Aberystwyth yn dweud: "Yn y cyfnod anodd hwn, er i ni ymdrechu mor galed i geisio dal ati yn Nhafarn Y Gors, rydym ni wedi penderfynu rhoi'r gorau iddi.

"Diolch i bawb sydd wedi ein cefnogi dros y tri mis diwethaf trwy'r gwasanaeth pryd ar glyd.

"Diolch hefyd am y gefnogaeth y cawsom ni cyn i'r Covid-19 ofnadwy yma ein taro ni."

Mae tafarn Y Fountain Inn, yn Nhrefechan, hefyd wedi penderfynu cau'n llwyr.

Yn ôl arolwg Cymdeithas Gwrw a Thafarndai Prydain [BBPA] byddai 40% o dafarndai'r wlad yn mynd i'r wal petai'r cyfnod clo yn para tan fis Medi.

Yn ôl y BBPA, mae'r diwydiant cwrw a thafarndai yn cyflogi 42,000 o bobl yng Nghymru ac mae werth £950m i'r economi.

Mae cymaint â thri pherchennog tafarn arall wedi dweud wrth ´óÏó´«Ã½ Cymru eu bod yn ansicr ynglÅ·n ag agor, hyd yn oed wedi i'r cyfyngiad gael ei godi.

Does dim dyddiad pendant wedi ei gyhoeddi gan Lywodraeth Cymru ynglŷn â phryd bydd modd i'r tafarnau agor.

Mae disgwyl i dafarnau yn Lloegr, Iwerddon a'r Alban agor dros y penwythnos.

Un arall sy'n "betrusgar" ynglÅ·n ag ailagor yw Sara Beechey o'r Hen Lew Du.

"Dwi ddim yn meddwl y byddwn ni'n agor yn syth, ac mae gyd yn dibynnu ar pryd a sut byddwn ni'n cael agor.

"Maen anodd gweld sut mae cadw pellter cymdeithasol mewn tafarn fel un ni."